Республикаялда хиралъулел руго кванил цо-цо нигӏматазул багьаби
Гьезда гьоркьор рехсезе бегьула картошка, гречка гӏадал нигӏматал.
Мисалалъе, картошкадул цо кило гьабсагӏат Махӏачхъалаялда буго 50-55 гъурущ. Дагьаб учузго буго гьеб Буйнакскиялда. Аналитиказул прогнозазда рекъон, тӏасияб соналъул ихдаде жеги хиралъизе рес буго картошка. Исана республикаялда мукъсанаб гурони бачӏин бакӏаризе рес ккун гьечӏо гьелъул.
Гьединго цӏакъго багьа бахун буго, мисалалъе, гречкадулги. Махӏачхъалаялъул бищун кӏудияб дармил централда гьеб буго 77 гъурщиде (цо кг.). Оптовиял базаразда абуни, 110 гъурщиде рагӏула гьелъул кило. Дармил централда гьеб учузго чӏеялъе гӏиллалъун ккун буго цебеккунго гречкадул гьез лъикӏаб нахърател гьабун букӏин. Мисалалъе босани, бананалъул цо килоцин гречкаялдаса учузго бугин дандеккола аналитиказ. Гьедин базараздагун тукабазда 99 гъурщиде буго бананалъул кило.