Бигъараб гӏомо
Гьаб бигъараб гӏомо дир гӏумру буго,
Бичизе, чучизе кодоб босуге,
Гьелда рарал гарцӏал дир магӏу буго,
Битӏизе гьабизе тӏад квер бахъуге.
Жеги мергуялда кьурун букӏаго,
Кьурун жемараб гьеб бартул шанкӏлида,
Долъ дунялги сверун юргъа бачараб,
Дир гӏумруялъул кун хадуб цӏалаго.
Гьелда рарал кӏичӏал цоцалъан раккун,
Цоялъ цояб гъанкъун къвакӏи бижараб,
Жиб-жибалда жанир чӏинхалги гӏунун,
Гӏодиги угьдиги дихъе бачӏараб.
Амма кинаб квекӏен данде чӏваниги,
Дугъдан ккун теркӏезе тӏаделъаниги,
Тӏураб бакӏ куналда батизе гьечӏо,
Гьеб цӏцӏел квасул гуро, цӏацӏан бачӏине.
Гьел рарал гарцӏазул, цӏарал кӏичӏазул,
Ралъдал хӏал хӏехьолеб щулалъи буго,
Щулаго ккола гьелъ кӏудиял ччугӏби,
Кӏал гьакӏкӏан гьитӏинал кваназе унел.
Гьаб бигъараб гӏомо дир гӏумру буго,
Бигъун букӏаниги дие хирияб,
Гьелда рарал гарцӏал дир магӏу буго,
Бакъван инчӏониги къоялъ урхъараб.