Коронаялда данде прививка гьабизе бокьарал дагьал гьечӏо
18 январалда улкаялда байбихьана коронавирусалда данде вакцина гьабизе. Гьеб тадбир унеб буго нилъер республикаялдаги.
Нижехъе щварал баяназда рекъон, гьабсагӏаталда вакцина гьабун буго 700-ялдасаги цӏикӏкӏун чияс.
Республикаялъул Сахлъи цӏуниялъул министерствоялъ 25 январалда тӏобитӏараб пресс-конференциялда бицана ракӏалда бугин 780 000 чиясе прививка гьабизе.
Аслияб куцалда гьеб гьабизе буго цӏикӏкӏараб ригьалъул гӏадамазе. Амма цо-цоязул тӏубан божилъиги гӏолеб гьечӏо гьеб вакцинаялда.
Киназулгойищ гьединаб пикру бугебали лъазе, нижеца цӏех-рех гьабуна батӏи-батӏияб хъулухъ-ишалъул гӏадамазда гьоркьоб.
Мухӏамад Мухӏамадов, Цӏунтӏа райадминстрациялъул лъай кьеялъул управлениялъул нухмалъулев:
— Нижер гьаниб бугеб ахӏвал-хӏалалъул бицани, вакцина гьабурал чагӏи руго, гьабизе бокьаралги руго. Амма гӏемерисел разилъулел гьечӏо. Дир пикруялда, гьеб иш гьабизе бегьила хӏал гьабичӏого, дагь-дагьккун, гьелъул бугеб кӏварги гӏадамазда бичӏчӏизабулаго.
Тӏоцебе гьеб гьабураб чагӏаз бицунеб букӏана хӏасил жал рохараб ккечӏин. Гьелъги батила, гӏадамазул тӏубараб куцалда божилъи гӏолеб гьечӏеб. Кин букӏаниги, нилъго нилъецаго цӏунизе ккела.
Гьеб вакцинаялъулъ унтуда данде чӏезе кӏолеб къуват загьирлъани, щай бегьулареб гьеб гьабизе?