Улкаялъул президент Владимир Путиница гъулбасги гьабун, республикаялъул Пачалихъияв секретарь Хизри Абакаровасе кьуна «Гьудуллъиялъул Орден». Гӏемерал соназ гьабураб ракӏбацӏцӏадаб хӏалтӏухъ ва гьесул хӏаракаталъе кьураб мустахӏикъаб къимат ккола гьеб.
Республикаялъул хӏукуматалъул нухмалъулев Гӏабдулпатахӏ Гӏамирхановасги баркана Х. Абакаровасда хӏурматияб шапакъат.
«Хӏакъикъат» газеталъул коллективалъги ракӏ-ракӏалъго баркула Хизри Абакаровасда хӏурматияб шапакъат. Тавпикъ кьеги республикаялъул гӏумруялъулъ лъикӏал лъалкӏал тезе.