Цӏибил бакӏаризе байбихьана республикаялда. Исана лъикӏаб бачӏин бакӏаризе ракӏалда буго цӏолбохъабазда. Кинабниги 22000 гектаралда бекьун буго цӏибил. Гьабсагӏаталда бакӏарун бахъана 2800 гектаралда бижараб нигӏмат. Араб соналда республикаялда бакӏарун букӏана 208000 тонна. Гьеб букӏана республикаялъул цӏолбохъанлъиялъул тарихалда босараб чӏел.
ДРялъул Росдал магӏишаталъул министерствоялъул нухмалъулесул заместитель Шарип Шариповас абуна, цӏолбохъанлъиялъул рахъалъ нилъер улкаялда къабул гьабураб цӏияб законалда рекъон, Россиялда чагъирин абизе бегьулин гӏицӏго нилъер цӏолбол хӏадур гьабу ралда. Цӏияб законалъ рес кьунин нилъер цӏолбохъанлъи цебетӏезабизе.
— Россиялъул чогърохъабазул цӏибил гӏезабулел жидерго ракьал гьечӏелъул, гьезул киназулго кӏвар буссун буго нилъер республикаялде. Гьелдаса нилъги рази руго. Рази рукӏинарищ, ахирал соназда цӏолбол оптовияб багьа 18 гъурщидаса тӏаде унеб букӏинчӏелъул. Гьанже рес щвана ахикьанго гьеб нигӏмат 25-27 гъурщиде кило гьабун бичизе, — ян абуна Шарип Шариповас.