Коронавирусалда данде къеркьеялъул оперативияб штабалъул статистикияб баяналда рекъон, 20 сентябралде щвезегӏан Дагъистаналда ковидалъ унтун вуго 50699 чи, гьезда гьоркьоса тӏуванго сахлъун больницаялдаса рокъове виччана 46574 чи, коронавирусалдаса хваразул къадар – 2429 чи. Статистикаялъул баяназда рекъон, ДРялда 19-20 сентябралда ковидалъ унтана 117 чи, сахлъун больницаялдаса рокъове виччана 140, хвана 7 чи.
Россиялъул регионазда гьоркьоб коронавирус унтиялдалъун бищунго хвел цӏикӏкӏаразда гьоркьоб Дагъистанги (4,79 процент) буго.
Коронавирусалъ унтаразда гьоркьоб бищунго цӏикӏкӏун хвел ккун буго Краснодар (8,2 процент), Ал- тай (5,31 процент) Красноярск (4,99) краязда, Чувашия республикаялда (6,67 процент), Тульск, Ростов областазда.
Москва шагьар ва областалда унтаразул къадар цӏикӏкӏараб бугониги, хваразул къадаралъул процент дагьаб буго (1,84 процент).
Дагъистаналда щайха хваразул къадар цӏикӏкӏунеб бугеб? Унтарас жиндир заманалда тохтурасул кумек тӏалаб гьабичӏолъиялъищ яги Дагъистаналъул медицинаялъул къуват гӏоларогойищ? Гьелъие цо чӏараб жаваб гьечӏо. Щивас гӏайиб цоцазде рехула.
Къойилго гӏадин кьогӏал харбал рагӏаниги, гьеб унтудаса цӏуна къайцин нилъецаги гьабулеб гьечӏо.
Ракӏалде ккола нилъер ракӏал ругьунлъунцин ратилин гьеб къварилъиялде, къойилго рихьулел хвелазде, унтуца кӏвекӏулел гьалмагъзабазул чарахварал гьурмазде.
Пандемиялъул заманалда коронавирусалъ унтун хваразул къавулъе, магӏирокъоре, зигараялъе гӏадамал гӏемер хьвадулел рукӏун ратичӏони, гьанже гьелъулги кӏвар гьабулеб гьечӏо. Масала, коронавирусалъ яги цогидаб унтуца хварав чиясул гӏагарлъиялъ къварилъи ккараб къоялъго лъазабулеб буго, жидеда зигара базе рикӏкӏадаса щивго вачӏунгеян. Бихьиназул рагӏиги гӏадахъ босичӏого, магӏарухъа шагьаралде яги гьениса магӏарухъе магӏирокъоре унел руго руччаби.
Унтудаса бугеб хӏинкъиялдасаги цебечӏолеб буго гӏадамазда цебе бугеб нич, ругьунаб гӏадат. Гьеб мехалда магӏирукъ лъугьунеб буго вирусал тӏиритӏулеб бакӏлъун.
Гьединаб бакӏалде лъимаде ругел ва чӏахӏияб ригьалъул руччаби гьукъулеб гӏадат билълъанхъизабуни лъикӏаб букӏинаан.