29 сентябралда Сергей Меликов дандчӏвана Росагролизинг АОялъул нухмалъулев Павел Косовгун. Нилъер республикаялдаги гьеб идараялдаги гьоркьоб къотӏи-къай хъвана цадахъ рекъон хӏалтӏи гьабиялъул мурадалда.
Дандчӏваялда гӏахьаллъана ДРялъул хӏукуматалъул вице-премьер Гӏабдулмуслим Гӏабдулмуслимовги РФялъул росдал магӏишаталъул министрасул гӏакълучи Юрий Касованги.
Гьел къотӏи-къаязул кӏудияб пайда бугин республикаялъул росдал магӏишаталъеян абуна Сергей Меликовас, документалда гъоркь гъулбас гьабун хадуб.
Тӏоцебесеб иргаялда, гьелъ рес кьолеб буго росдал магӏишаталъул нигӏматал хӏадур гьаризе хӏажатаб къайи-цӏа босизе.
Гьединго рес ккезе буго кӏикӏундерил консервал хӏадурулеб завод цӏи гьабизеги. Жиндир заманалда гьеб завод букӏана республикаялъул брендлъун.
Павел Косовас бицана жинда бихьулеб бугин Дагъистаналъул агрокомплексалъулаб бутӏаялда гӏемерисеб къайи-цӏа басралъун букӏин. Хехаб куцалда гьеб цӏи гьабизе бугин абуна гьес.