24 ноябралда ДРялъул хӏукуматалъул минаялъуб тӏобитӏараб данделъиялда бицун букӏана республикаялъул шагьранухазда гьечӏеб лъикӏаб хӏалалъул хӏакъалъулъ. Масала, 10 моцӏида жаниб 1145 авария ккун буго республикаялда. Хун вуго 247 чи, лъукъун больницаялде ккаразул къадар бахун буго 1606 чиясде.
Гьединаб талихӏкъосараб хӏал республикаялда батани, гьелда бан гьабулеб хӏалтӏи цӏакъго тӏаса-масагояб букӏин бихьулеб бугин абуна данделъиялда гӏахьаллъи гьабурав республикаялъул бетӏер Сергей Меликовас.
— Бищун аслияб гӏиллалъунги бихьулеб буго жинца гьабураб такъсиралъухъ тамихӏ букӏине гьечӏеблъиялда машина бачунесул ракӏчӏун букӏин. Гьединал чагӏи сабаблъун холел руго гӏемерал гӏадамал, гӏумруялъго сакъатлъун хутӏулел руго жеги цӏикӏкӏун. Цӏакъ пашманаб сурат буго. Нухда гӏадлу-низам хвезабурав гӏолохъанчи ватаниги, ригьалде вахарав ватаниги, гьесда лъазе ккола жаваб кьезе букӏин, — илан абуна бетӏерас. Гьелда тӏад ракӏунтун хӏалтӏизе ахӏана гьес низам цӏунулелги.
Араб анкьалда тӏолабго улкаялдаго рагӏараб иш ккана Москваялъул Кутузовасул цӏаралда бугеб проспекталда. Кутакаб хехлъиялда бачӏунеб BMW маркаялъул машина речӏчӏана жеги кӏиго автомобилалда. Хӏасилалда BMW-ялъув вукӏарав кӏигояв хвана. Гьезул цояв ккола рулалда нахъа вукӏарав Сагӏид Губденский. Автомобилазул темаялда социалиял гьиназдасан гӏемер цеве вахъунев блогер вукӏана гьев. Социалиял гьиназда цӏакъ машгьурлъунги букӏана гьесул цӏар. Цадахъ вукӏарав гьесул гьудул, Дагъистаналъул автомобилистазул ва мотоциклистазул ассоциациялъул нухмалъулев Заур Ибрагьимов больницаялда хвана.
Социалиял гьиназда хъвалеб букӏана Сагӏид Губденскияс жиндирго цо видеороликалдасан гӏолилазде хитӏаб гьабулеб букӏанин нужеца машинаби хъамугейин абун…
Церегӏан къоязда Дагъистаналдаги ккана вахӏшияб авария. Шамхал-Термен поселокалда аскӏоб, «Приора» автомобиль речӏчӏана бетоналъул хӏоболъ. Гьенир жанир рукӏаразул цояв хвана, цогидал захӏматаб хӏалалда больницаялде ккана.