Гӏарац Москваялде щай нахъбуссинабулеб?
ДРялъул финансазул министрасул ишал тӏуралев Гӏали Исламовас бицана бюджеталда цӏикӏкӏарасеб гӏарац (85 процент) бихьизабун бугин социалиял мурадазе, гьединго хӏисабалде босун бугин пачалихъалъ экономикаялъе гьабизесеб кумекги.
Гьедин, масала, тӏадеялъул республикаялда 188 объект базе байбихьула. Гьезда гьоркьоса 86 объект ккола социалияб кӏваралъул, 101 – ЖКХялъул. Нухазул фондалъ харж гьабизе буго 10, 3 млрд гъурущ. Киналго муниципалитетазе биччазесеб бюджетазда гьоркьосеб гӏарцул къадар букӏине буго 42,5 млрд гъурущ. Цебеялда дандеккун лъабго миллиард гъурщица цӏикӏкӏун буго гьеб.
Депутат Мухтарпаша Гӏумахановас Гӏали Исламовасда гьикъана федералияб бюджеталдаса республикаялде бачӏунеб гӏарац харж гьабизе бажаричӏого санайилго тӏад буссинабулеб букӏиналъул хӏакъалъулъ. Гьелъие гӏиллабиги батӏи-батӏиял рехсола тӏадчагӏаз. Масала, проектазулгун сметабазул документал битӏун цӏезе лъангутӏи яги гьелъие заман гӏечӏолъи, аукционал гьарулелъул кколел квалквалал ва цогидаб. Гьединлъидалин абуна Мухтарпаша Гӏумахановас, цӏида-цӏидасанги цого гъалатӏал такрар гьарулел рукӏинчӏого, гьанже цӏияб хӏукуматалъул вакилзабаз бегьуларищин гьеб хӏужа хӏисабалде босизе?
Гьебго пикру загьир гьабуна депутат Султан Ибрагьимовасги: «Ункъабилеб сон буго рес рекъолеб гьечӏилан, Лъаратӏа районалъул нухазде хъил тӏезе бажаруларого. Хӏакъикъаталдайин абуни, санайилго Москваялде тӏад буссинабулеб буго 8-10 млрд гъурущ. Гьеб гӏарцухъ чан школагун ясли-ахдай базе бегьилаан, кигӏан нухалдай рахъилаан?»
Гӏали Исламовас жаваб кьуна гьеб букӏунин хас гьабун жинди-жиндир мурадги бихьизабун федералияб бюджеталдаса биччараб гӏарац. Гьединлъидал гьеб батӏияб мурадалъе харж гьабизе бегьуларин. Лъаратӏа районалда нухазде хъил тӏеялъул суал жинца «Дагавтодоралдеги» Транспорталъул министерствоялдеги щвезабилин рагӏи кьуна министрас.
Хадубго депутат Махӏмуд Махӏмудовасги тӏаде жубана гьанже пачалихъалъ экономикаялъе кумек гьабулеб къагӏида хун бугилан. Гьединлъидал гьес министрасда гьикъана республикаялъул экономикаялъе биччалеб бугеб 136 млн гъурущ хас гьабун сунда тӏад харж гьабизе бугебилан. Гӏали Исламовас жаваб кьуна гьеб бугин промышленниял предприятиязе кредитал хӏисабалда ва къайи-цӏа босизе кумекалъе биччалеб гӏарац.
Жеги гӏемер кӏалъаял гьаруна сессиялда бюджеталда тӏасан. Депутатаз гьарурал тӏасанкӏалъаял кӏиабилеб нухалда гьеб проект гьоркьоб лъолелъул хӏисабалде росилин абуна спикер Заур Аскандаровас.
Хайир гьечӏел ГУПал
Хадуб депутатаз разилъи кьуна ункъо ГУПалъе приватизация гьабизе. Гьел ккола «Чӏикӏаб», «Дилим», гьединго Лаваша районалъул Микӏахӏи росдал «Богатыревасул» ва Сергохъала районалъул Мюрего росдал «Красный Октябрь» ГУПал.
ДРялъул мал-мулкалъул ва ракьул суалазул министрасул ишал тӏуразарулев Заур Эминовас абуна гьез букӏине кколеб хайир кьолеб гьечӏилан.
Хадубккун гьединабго приватизация гьабизе рес бугеб предприятиязул сияхӏалде босизехъин буго «Махачкалинский цементно-помольный производственный комбинат» абураб акциячагӏазул гӏуцӏиги.
Сессиялда 64 депутатас разилъи кьуна QR-кодал рилълъанхъизариялда бан гӏуцӏараб законалъул проекталъеги. Ункъо чи гьелда дандечӏана. Анкьгояс гьаракь кьечӏо.
Харжал цӏикӏкӏина
Росабалъ гӏумру гьабулел цо- цо хъулухъчагӏазе 25 проценталъ харжал цӏикӏкӏинаризехъин ругин бицана гьениб захӏматалъул ва социалияб цебетӏеялъул министрасул ишал тӏуразарулей Зумруд Мухӏудиновалъ.
Ахиралда депутатаз хӏукму гьабуна гьал къоязда ДРялъул Пачалихъияв секретарьлъун тӏамурав Мухӏамад- Султан Мухӏамадовасухъа Халкъияб Собраниялъул депутатасул мандат нахъе босизе.
Гьенир гьоркьор лъун рукӏана цогидал суалалги.
Зульфия ХӏАЖИЕВА