22 марталда Федералияб Казначействоялъул ДРялда бугеб Управлениялъул (УФК) нухмалъулевлъун тӏамуна экс-премьер Гӏабдулпатахӏ Гӏамирханов.
Гьеб мурадалда Махӏачхъалаялде вачӏарав Федералияб Казначействоялъул нухмалъулесул заместитель Эли Гӏисаев дандчӏвана ДРялъул бетӏер Сергей Меликовгун. Гьеб дандчӏваялда вукӏана хӏукуматалъул председатель Гӏабдулмуслим Гӏабдулмуслимовги.
Сергей Меликовас Эли Гӏисаевасда абуна бицен гьабулеб хъулухъалде Гӏабдулпатахӏ Гӏамирханов тӏамизе рахъккуралъухъ гьев жанив хӏалтӏулеб идараялдасаги Россиялъул финансазул министр Антон Силуановасдасаги кӏудияб разилъи бугин жиндир.
Гӏабдулпатахӏ Гӏамирханов УФКялъул нухмалъиялда теялдалъун жидееги бигьалъизе бугин республикагун цадахъ рекъон хӏалтӏизе, гъалатӏал ккечӏого, кӏуди-кӏудиял проектал тӏуразе бажаризе рес букӏинилан Гӏисаевасги тӏаде жубана.
Гьелдаса хадуб УФКялъул коллективалда Гӏабдулпатахӏ Гӏамирханов вихьизавизе гьениве ана хӏукуматалъул председателасул заместитель Руслан Гӏалиевги.
Цевехун бицен гьабурав Эли Гӏисаевасда цадахъго гьеб тадбиралда гӏахьаллъана Чачан Республикаялда ва Ингушетиялда УФКязул нухмалъулеллъун ругел Гӏабдул Мухӏамадовги Ильяс Угурчиевги.
Гӏабдулпатахӏ Гӏамирхановасде щвезегӏан ДРялда бугеб УФКялъул нухмалъулесул ишал тӏуразарулаан гьабсагӏаталда гьесул заместительлъун вугев Исрапил Тӏинамухӏамадовас.
PS. Казначействоялъул контора Россиялда гӏуцӏун букӏана Пётр Тӏоцевесесул заманалда, 1710 соналдаго.
Цинги улкаялъул бетӏерлъуде батӏи-батӏиял пачазаби ккедалги советияб заман бачӏингунги, гьеб хъулухъалъул хӏалтӏулъ хиса-басиял лъугьун рукӏана. 1991 соналда абуни пачалихъалъул цогояб бюджеталъул бакӏалда баккана лъабго батӏияб даражаялъул бюджеталъул къагӏида.
1992 соналда улкаялъул президентас кьураб буюрухъалда рекъон, Россиялда гӏуцӏана Федералияб Казначейство.
Дагъистаналда гьеб хӏалтӏизе лъугьана 1996 соналда.