Республикаялъул хӏукуматалъ рахъккуна Каспийскиялъе «Город трудовой доблести» абураб цӏар кьезе шагьаралъул нухмалъиялъ загьир гьабураб пикруялъул.
Хӏукуматалъул нухмалъулев Гӏабдулмуслим Гӏабдулмуслимовас гьеб пикру дандбана Сергей Меликовасулгун. Цӏакъ лъикӏаб пикру бугилан, гьесги рагӏи кьуна гьеб суал улкаялъул президент Владимир Путинилгун дандбазе.
Битӏараб бицани, гьединаб цӏар щвезе мустахӏикъаб шагьар буго Каспийск. «Дагдизель» завод гучалда букӏарал 1970-1980-абилел соназда 40 000 чи хӏалтӏулаан гьенив.
Тӏубараб шагьарго гьениб жаниб хӏебтӏун букӏанин абуни, мекъи ккеларо. Гьединаб захӏматалде ругьунаб халкъги бугеб бахӏарчияб шагьар ккола Каспийск. Биччанте гьелъие хӏурматияб цӏарги щвезе.
Ашахан Юсупов