Гьал къоязда ДРялъул нухмалъулесул официалияб сайталъ загьир гьаруна пачалихъиял хъулухъазда ругел республикаялъул бетӏерасул ва хӏукуматалъул Администрациялъул (АГиП) вакилзабазе 2021 соналда щвараб хайиралъул хӏакъалъулъ баянал.
Хӏукуматалъул председатель Гӏабдулмуслим Гӏабдулмуслимовасе щвараб хайир бащалъулеб буго 12144657,39 гъурщида. Гьесул бетӏергьанлъиялда буго кӏиго машинаги (ГАЗ-31029, ГАЗ-3102), ракьул цо участокги, минаги, дачаги. Гьес пайда босулеб буго 84 кв. м. кӏодолъиялда бугеб цо квартираялдасаги. Гьединго премьерасул лъадуе щвараб хайир кколеб буго 248 468,32 гъурущ. Гьелда тӏад хъван буго дачаги цо квартираги.
ДРялъул пачалихъияв секретарь Мухӏамадсултӏан Мухӏамадовасе щун буго 1723239,85 гъурущ. Гьес пайда босулеб буго цо минаялдаса. Мухӏамадовасул лъадуда тӏад буго лъабго участокги, лъабго квартираги, цо минаги. Лъагӏалида жаниб гьелъие щун буго 205915,47 гъурущ. Цониги машинаги гьечӏо гьезул.
АГиПалъул нухмалъулев Алексей Хӏасановасе щвараб хайир бащалъулеб буго 20282416,47 гъурщида. Гьесул бетӏергьанлъиялда буго: маломерное судно МАСТЕР ПРО 470, прицеп МЗСА 81771Е; цо квартира, пайда босулеб буго цо минаялдаса. Лъадуда тӏад буго цо минаги, цо участокги, Toyota Lexus RX270 машинаги. Лъагӏалида жаниб гьелъие щун буго 429324,89 гъурщил хайир. Гьединго гьелъги пайда босулеб буго цо минаялдаса.
Премьер-министрасул тӏоцевесев заместитель Руслан Гӏалиевасе щун буго 5554 698,68 гъурущ. Амма жинца пайда босулеб кӏиго квартира гурони, тӏокӏаб мал-мулк гьесда хадуб гьечӏо.
Хӏукуматалъул председателасул цогидав заместитель, ракьулгун буголъиялъул суалазул рахъалъ министр Заур Эминовасда хадубги бихьизабун гьечӏо кинабгӏаги буголъи, гӏицӏго жинца пайда босулеб цо квартира гурони. Лъагӏалица хӏалтӏун гьесие щун буго 1432692,0 гъурщил хайир. Министрасул лъадул бетӏергьанлъиялда буго цо квартира.
Контролиябгун финансазул рахъалъ ДРялъул бетӏерасда цебе гӏуцӏараб Управлениялъул начальник Т. Шабановасе щун буго 2692766,23 гъурущ. Гьесул бетӏергьанлъиялда буго гӏицӏго ракьул цо участок, лъадуда тӏад – цо квартира. Машина гьечӏо.
Палхӏасил, гьениб буго 24 чиясул цӏар. Амма цо-цояз рихьизарурал баяназухъ балагьун, щаклъизе бачӏуна. Масала, гьелда тӏасан «Хӏакъикъаталъе» гьадин бицана «Новое дело» газеталъул бетӏерав редактор Хӏажимурад Сагитовас:
«Дир хӏисабалда, цо-цо хӏакимзабаз гьениб бихьизабулеб буго унго-унголъунги жидее щвараб хайиралъул цо пуланаб бутӏа. Гьелдалъун гьез хӏаракат бахъулеб буго бизнесги мал-мулкги налогаздаса бахчизе. Амма гьедин букӏанигицин, абизе бегьула — гьеб декларация ккола пачалихъиял хъулухъчагӏазул ишазда сверухъ ахӏвал-хӏал роцӏинабиялде хӏакимзабаз тӏамулеб гали. Хадубккун жеги камиллъизабизе ккола гьеб хӏалтӏи».
З. Хӏажиева