Россиялъул судазул приставазул ДРялда бугеб хъулухъалъ улкаялъул гӏорхъи бахине гьукъун буго 45 азарго дагъистаниясе. Гьел ккола батӏи-батӏиял налъаби жиндир заманалда рецӏичӏого тарал гӏадамал.
Гьединал гьукъа-къаял лъеялдалъун налъулазухъа нусгоялде гӏагарун млн гъурущ бахъизе бажарун буго приставазда.
Бицен гьабулел гӏадамазда гьоркьор хӏежалде унел чагӏи ратизеги рес буго. Гьединлъидал аэропорталдасан нахъруссинаризе ккеларедухъ, заманалда жидер тӏалабазде кӏвар кьеян хитӏаб гьабулеб буго приставаз гьезде.