28 маялда Гумбет районалъул Килалъ росулъ тӏобитӏана рес публикаялъулаб даражаялда чуял тӏамиялъул фестиваль. Килдерил росдада цебе «Роччоб» майданалда «Шамил имамасул хъала» абун цӏар кьураб гьеб тадбиралда гӏахьаллъи гьабуна мадугьалихъ респу- бликаялдасаги малъун, 40 чотӏахъанас.
Килалъ росулъ гъоркьисаги тӏобитӏун букӏана гьединабго тад- бир. Амма исанасеб фестивалалъул даража бергьун кӏудияб букӏана.
Цохӏо чотӏахъаби гурелги, гӏемерал гьалбалги рачӏун рукӏана гьенире. Районалъул нухмалъулев Гъалип Гъалиповас баркала кьуна фестивалалде рачӏарал гьалбадерие ва мадугьалихъ республикаялдаса рачӏарал чотӏахъабазе.
Тадбир нухда бачана «Гумбет» районалъул информациялъулаб бутӏаялъул нухмалъулев, РФялъул Журналистазул ва Хъвадарахъабузул союзазул гӏахьалчи Хӏамзат Гӏизудиновас.
Тӏоцебесеб къецалда, лъабго свериялда бекерун бергьана Цӏиликьа бекерухъан «Малыш» абураб барти. Кӏиабилеб бакӏ щвана Камил Хӏасановасул «Буртунай» абун цӏар бугеб айгъиралъе. Лъабабилеб бакӏалъе мустахӏикълъана Мухӏамад Мухӏамадовасул «Зорро».
Щуго свери нахъа тезе кколел къецазда тӏоцебесеб бакӏ щвана Мухӏамадхӏабиб Къабуловасул «Акбар» чодуе. Кӏиабилеб бакӏ ккуна Мухӏамад Исрапиловасул «Гӏусмания» айгъиралъе, лъабабилеб бакӏалде бачӏана Мухӏамад Сиражудиновасул «Гӏоротӏа» бекерухъан.
Хӏалуцарал къецал рукӏана фестивалалъул бищун халатаб манзил, ай 11 километралъул халалъиялда рекерулел чуязда гьоркьоб. Гьениб тӏоцебесеб бакӏги щун, бергьана Чачан республикаялъул Беноялдаса Мухӏамад Уцумиевасул «Сонк» бартичу, кӏиабилеб бакӏалъе мустахӏикълъана Ахӏмад Мухӏамадовасул «Ирхат» айгъир, лъабабилеб бакӏ щвана Ансалтӏаса Шарапудин Къурбановасул чодуе.
Бищун аваданал къецал рукӏана хӏамул рекеризе риччаялъул рахъалъ. Килалъа Мухӏамад Шейхулисламовасул «Мустанг» абураб бихьинхӏамица исана данде базе течӏо цониги гӏундул халатаб жиндирго гьалмагъ.
Гьединго къецал рукӏана рекерухъабазда гьоркьорги.
Гьалбадерие хӏадурун букӏана магӏарул миллияб квен-тӏехалъул тепсиги. «Роччоб майданалда журналистазе пресс-турги букӏана хӏадурун «Гумбет» РИОялъул нухмалъиялъ.
Гьединабго тадбир дагьал церегӏан къоязда тӏобитӏун букӏана Болъихъ районалъул Рахатӏаги.
Ахирал соназда республикаялда цӏакъ машгьурлъун буго чуяздехун гьабулеб бербалагьи. Лъикӏалъикӏал багьабиги кьун росулел руго гӏолохъабаз гьел. Хӏатта цоцояз кӏи-кӏи, лъаб-лъабцин.
Кӏиго соналъ цебе нилъер республикаялда цӏи гьабун гӏуцӏана чуязул спорталъул рахъалъ федерацияги. Гьелъул нухмалъулев Зубай Мухӏамадовасул рагӏабазда рекъон, къо бахъанагӏан цӏикӏкӏунеб буго гӏадамазул чуяздехун бугеб интерес.
— Араб кӏиябго соналда жаниб чотӏахъабазул щуго клуб гӏуцӏана нижеца республикаялда. Гьоркьоса къотӏичӏого тӏоритӏула батӏибатӏиял къецалги. Нилъер умумузул заманалда чу кидаго букӏана чара гьечӏо хӏажатаблъун. Рагьтӏа чуги, магӏида ярагъги кидаго букӏана умумузул. Цо заманалда гьоркьобкъотӏи ккун гьелдехун гӏадамазул гъира-шавкъ дагьлъун букӏанин абизе бегьула. Букӏун батила гьелъие гӏиллаги. Цӏияб заманалда, цо-цо цебе гӏадатлъун букӏараб жо дагьаб нахъе цулеб къагӏида бугелъул. Гьанже цӏилъун бачӏана гӏадамазул чуяздехун бугеб рокьи, — ян бицана З. Мухӏамадовас.
Гьединго щибаб соналъ гӏадин чотӏахъабазул сапар абун, магӏарулазул тарихиял бакӏазде щола нилъер гӏолохъаби. Тӏадмагӏарухъ ругелщинал чотӏахъабиги данде гьарун, гьеб сапаралъул аслияв цевехъанлъун вугин абизе бегьула гӏолилазул жамгӏияв хӏаракатчи Кӏуядаса Мухӏамадхӏабиб Гӏалискандиев.
Мисалалъе, Надир-шагьасда тӏад магӏарулаз бергьенлъи босараб, Сугъралъ росдада аскӏоб бугеб, Хицӏиб магъилъ бараб «Ватӏан» мемориалияб комплексалде щола гьел. Гьединго сапар гьабула Ахӏулгохӏде, Гьоор-Хьиндахъе, Къелебе ва Гьидалъ мухъалде, Къаралазулгун Кьесеразул росабалъе.