21 июналда нилъер хӏажизабазул тӏоцебесеб къокъа къватӏибе бахъана.
Исана Россиялдаса хирияб ракьалде сапар гьабизе буго 12 500 чияс.
Нилъер республикаялдаса хӏежалде ине вуго 7500 чи. Улкаялъул киналго
регионазда гьоркьоб гьеб ккола нилъее щвараб бищун цӏикӏкӏун квота.
Пандемиялъул хӏасилалда гьоркьоб къотӏунги букӏун, лъабго сон индал
тӏоцебе гьабулеб хӏежалъул сапар буго исана байбихьулеб.
— Санкциял лъазарун рукӏиналда бан, Россиялъе кьолеб квота 50 проценталъ дагь гьабуна исана, — ян бицана РФялъул «Хӏаж-миссиялъул» нухмалъулев
Хӏизбула Асуевас.
— Гьеб букӏинчӏебани, 25 000 чиясе рес букӏана хирияб ракьалде сапар гьабизе. Амма санкциял
сабаблъун квота дагь гьабуниги, улкаялдаса хӏежалде унел гӏадамазул хӏисаб гьабун, цебего гӏадин 50 процент хӏажизабазул нилъер республикаялдаса буго.
Бакътӏерхьул пачалихъаз Россиялъулгун кьал ахӏун букӏиналда бан, гӏемерал квалквалал кканин исанаян бицана Хӏ. Асуевас. Гьелъул хӏакъалъулъ
нижеца гӏатӏидго бицина газеталъул хадусеб номералда. ИншАллагь.