10 августалда Болъихъ районалда тӏобитӏана республикаялъул Бетӏерасда цебе бугеб гражданияб жамгӏият цебетӏезабиялъул ва инсанасул ихтиярал цӏуниялъул советалъул данделъи. Гьенив гӏахьаллъана районалъул бетӏер Руслан Хӏамзатовги, гьединго Болъихъ, Цӏумада, Гумбет районазул бутӏрузул заместителалги.
Дандеруссин рагьана Руслан Хӏамзатовас.
— Нижеца кӏудияб кӏвар кьолеб буго чӏахӏиязул мисалалда гӏун бачӏунеб гӏелалъе ватӏан бокьиялъулгун интернационалияб тарбия кьеялде. Гьелъие нижеца рукӏине кколел шартӏалги чӏезарун руго, — ян абуна гьес.
Дагъистаналда гражданияб жамгӏият цебетӏеялъул хӏакъалъулъ бицана республикаялъул бетӏерасда цебе гӏуцӏараб гьеб Советалъул председатель Зикрула Ильясовас.
Бицен гьабулеб хӏалтӏи цебетӏеялъе Болъихъ районалда гьабулеб бугеб хӏалтӏул бицана жамгӏияб хӏинкъигьечӏолъиялъул рахъалъ районалъул бетӏерасул заместитель Гӏабдулдибир Гӏабдулдибировас.
Бесдалазе минаби кьеялда сверухъ республикаялда бугеб ахӏвал-хӏалалъул хӏакъалъулъ баянал кьуна «Бесдалал гьечӏеб Дагъистан» гӏуцӏиялъул нухмалъулей Раисат Гӏусмановалъ.
Гьединго тадбиралда кӏалъана районалъул Жамгӏияб палатаялъул председатель Мухӏамад Иманшапиев, «Балъхъал» жамгӏияб гӏуцӏиялъул нухмалъулев Мухӏамаднур Мухӏамадов, «Инсан» фондалъул районалда бугеб филиалалъул нухмалъулев Мухӏамадрасул Мухӏамадов, районалъул Собраниялъул председатель Мухӏамаднаби Гӏумаров.
Хадубккунги гражданияб жамгӏияталъул институтазул хӏалтӏи дагьабги лъикӏлъизаби мурадалда гьаризесел хӏалтӏабазулги бицана гьениб. Гьелде кӏвар кьезе ккеялъул бицунаго, Зикрула Ильясовас абуна районалда гьеб хӏалтӏи тӏадегӏанаб даражаялда гӏуцӏун бугилан.
Гьединго гьес тӏадчӏей гьабуна интернационалияб тарбия кьеялъул лъикӏал гӏадатал тӏадруссинаризе ккеялъул ва рахьдал мацӏаздехун бугеб бербалагьи лъикӏлъизабизе ккеялъул хӏакъалъулъги.
Жиндир заманалда «Хӏакъикъат» газета хъваялъе тасамахӏлъи бихьизабурал хӏалтӏухъабазул чангоясе административияб тамихӏ гьабунила ва гьанже гьеб суал цойиде ккезабун бугилан районалъул администрациялъул бетӏер Р. Хӏамзатовас бициндал, данделъиялъул ахиралда Зикрулаца гьесие баркала загьир гьабуна ва Советалъул рахъалдасан хӏурматалъул грамотаби кьуна районалъул жамгӏияталъул хӏаракатчагӏи Мухӏамад Иманшапиевасе, Шамилхӏажи Латӏиповасе, Мухӏамадрасул Мухӏамадовасе.
Нижер мухбир