Канлъи цӏунулел къагӏидаби
Анлъабилеб марталда дунялалдаго кӏодо гьабуна глаукома унтуде дандечӏеялъул къо
Глаукомаялде данде къеркьеялде кӏвар цӏикӏкӏинабиялъул мурадалда, 2008 соналдаса нахъе гьелъул бицунеб къолъун бихьизабун букӏана анлъабилеб март. Глаукома ккола беразда жанисеб бидул тӏадецуй цӏикӏкӏиналдалъун лъугьунеб унти. Гьелъул хӏасилалда канлъиялъул нерв хола, канлъи дагьлъула яги тӏубанго беццлъула.
Унти лъугьунеб куц
Жеги лъазе кӏун гьечӏо глаукома лъугьиналъе гӏилла щиб кколебали. Беразул бидул тӏадецуй (ВГД) цӏикӏкӏанагӏан, канлъиялъул жаваб кьолеб нерв хола.
Глаукомаялъул батӏи-батӏиял тайпабиги дандчӏвала. Гьезда гьоркьоб бищунго цӏикӏкӏун дандчӏвала рагьараб бокӏоналъул (открытоугольная) глаукома.
Дунялалдаго 2-3 % гӏадамазул глаукома унти буго. Россиялда 1,2 миллион чиясул глаукома унти буго. Глаукома лъугьиналъул гӏилла лъаларо, амма гьеб лъугьине рес буго
40-ялдаса цӏикӏкӏун сонал рарав чиясул; гӏагарлъиялъул цогӏагиязул глаукома букӏун батани; ракӏ унтараб бугони; артериалияб гипертония яги гипотония бугони; гӏадал нах гьорой (мигрень) бугони; стероидал гьекъолел ругони.
Дару гьабичӏони беццлъизе рес бугеб захӏматаб унти жиб букӏаниги, глаукома бугев чияс гӏадатияб гӏумру тӏамизе бегьула. Офтальмологасул бербалагьиялда гъоркь гьоркьоса къотӏичӏого даруги гьабизе ккола.
Беразул бидул тӏадецуй бугев чияс мехтизарулеб жо гӏемер гьекъезе бегьуларо. Хъалиян цӏалел чӏахӏияб ригьалъул гӏадамазда гьоркьобги унти ккеялда хӏинкъи буго. Бецӏаб рокъоб телевизоралъухъ ралагьизеги лъикӏаб гьечӏо. Спорталъулги кӏудияб кӏвар букӏуна глаукома бугесул чорхое. Гьединго унтарас гӏураб къадаралда кьижизе ва хӏухьбахъи гьабизе ккола.
Тӏубанго сахгьабизе кӏоларо
Глаукома ккола гӏиллаго гьечӏого баккулеб унти. Гӏемерисезда лъаларо жидерго глаукома букӏин цӏакъго канлъи дагьлъараб мехалда гурони. Дару гьабулеб гьечӏони яги заман анагӏан глаукома бугев чиясул канлъи тӏубанго ссун инеги рес буго.
Сахал беразда жаниб гьоркьоса къотӏичӏого хӏалтӏула берзул лъамалъи. Гьеб лъамалъи хьвадиялъул къагӏида хвани, лъамалъи бадибе бакӏарун хутӏула ва гьелъ берзул бидул тӏадецуй цӏикӏкӏинабула.
Глаукома унтиялъе аслияб дарулъун ккола берзул жанисеб тӏадецуялда (ВГД) хадуб халкквей. ВГД ккезе биччачӏони, берзул канлъи цӏунизе бегьула. Жиндир заманалда ва битӏун диагноз лъезе кӏвани, унти лъалхъизабизеги кӏола.
Лазералъулаб операция
Глаукома унтуца тӏубанго беццлъизариларедухъ берзул жанисеб тӏадецуй дагьлъизабизе ва берзул унтараб нерв сах гьабизе бегьула. Беразул жанисеб тӏадецуй (ВГД) гӏодоцинабизе лъикӏаблъун офтальмологаз медикаментазулаб къагӏида бихьизабула. Гьел ккола бадире тӏинкӏулел дараби. Цо-цоязухъа гьеб къагӏида хӏалтӏизабун бажаруларо, глаукомаялде данде бадире тӏинкӏулел дараби багьаял рукӏунелъул ва гьел гьоркьоса къотӏичӏого гьаризе кколелъул. Дараби гьаруниги берал сахлъулел гьечӏони, лазералъулаб хирургиялъул къагӏида хӏалтӏизабула.
Рагьараб бокӏоналъул глаукомаялъе лазералъул операция гьабулаго, беразда жаниб букӏунеб лъамалъи кколеб хӏалалда хӏалтӏуледухъ лазералъул чӏоралъ гӏисинал къорал гьарула берзул цояб бокӏоналда ва гьелдалъун берзул бидул тӏадецуй дагьлъула.
Цо-цо мехалда лазералъулаб операция гьабун хадуб заманалдасанги цӏидасан цӏикӏкӏине бегьула беразул жанисеб тӏадецуй. Гьеб мехалда операция гьабичӏого жо кколаро.
К. Керимова, Р. Багьавудинова, М. Пайзулаева, Хӏ. Гӏ. Булачил цӏаралда бугеб республикаялъулаб офтальмологияб
больницаялъул глаукоматознияб централъул ординаторал