Кечӏ букӏана маяклъун
Сайпулагьил юбилеялъулаб данделъи тӏобитӏана гьесул росуцояз, гӏагарлъиялъ
Кечӏ букӏана маяклъун
Сайпулагьил юбилеялъулаб данделъи тӏобитӏана гьесул росуцояз, гӏагарлъиялъ
Махӏачхъалаялда, «Экзотика» залалда тӏобитӏана Шамил районалъул Ругъелда росулъа Гьитӏинамухӏамадов Сайпулагьил 70 сон тӏубаялъул тадбир.
«Хӏакъикъаталъул» цӏалдолезда Сайпулагь щивали лъаниги, бокьун буго гьесул хӏакъалъулъ дагьабго калам гьабизе. Гьевин абуни ккола тохтурги мугӏалимги. Гьелдего тӏаде, Сайпулагь машгьурлъана шагӏир, журналист хӏисабалдаги. Гьеб рахъ гьесие цӏакъго хириябги буго. «Дун гьавураб къоялъ» абураб жиндирго кочӏолъги гьес хъвалеб буго:
Цо-цо къварилъабаз къвал баниги щиб,
Къисматалъ недегьго веэдана дун.
Дандеккунгутӏияз кеп кьечӏониги,
Кечӏ букӏана даим дие маяклъун.
2014 соналда къватӏибе биччана Сайпулагьил «Къелестан» абураб тӏехь. Гьавураб бакӏ, ватӏан гьесие цӏакъ хириябги буго:
— Дур ватӏан щиб? Дагъистан.
— Гӏураб бакӏ щиб? Къелестан.
Цоги:
Дагъистан — цӏвабзазул зоб
Къелестан – гьениб цо цӏва.
Цоги:
Къисмат дудаса тӏураб,
Батӏияб гьалъул гьечӏо.
Гьаб цо дур гъотӏол гӏаркьел,
Гьаб цо дур гӏурул рикьи.
2019 соналда къватӏибе биччана кӏиабилебги тӏехь ва гьелдаги цӏар тана «Къелдерил сверуда» абун. Гьебги ккана хасаб сабаблъун гьеб тадбир тӏобитӏиялъе. Гьеб тадбир гӏуцӏана гьесул ракьцояз, гӏагарлъиялъ ва гьудул-гьалмагълъиялъ. Гьесул буго лъикӏаб тарбия щвараб 5 лъимер ва 13 лъимадул лъимерги.
Бищунго гьев чӏухӏулеб жо ккола ракӏбацӏцӏадал, живго гӏадал гӏемерал гьудулзаби. «Экзотика» залалдаги гьезул вакил камураб цониги росу букӏинчӏин абизеги бегьула. Рукӏана Гъуниб, Чӏарада, Болъихъ районаздасаги гьалмагъзаби. Кавказалъул хъвадарухъабазул клубалъул филиалалъул директор Насрулаев Мухӏамадица гьесул каранда бана «Золотая медаль Есенина за верность традиции культуры и литературы» абураб шапакъат. Шамил районалъул бетӏерасул рахъалдасан кьуна грамота ва гӏарцулаб сайгъат. Гьев кӏодо гьавизелъун гӏуцӏараб тадбирин абуни лъугьана унго-унгояб къелдерил «цӏадахъ руссенлъун», магӏарул годекӏанлъун.
Гьеб тадбиралда щивав гьоболасе, гьесул гьудулзабазе сайгъат гьарурал кучӏдул цӏалана гьесул лъималазул лъималазги.
Сайпула киданиги хилиплъичӏо жиндирго кочӏол мухъазеги:
Гьобол-гьудул хиралъи,
Рогьояб, тӏекъаб рихи,
Ритӏухъалда тӏадрекъей,
Къадруяб ишин гьаниб.
Ругъелда росдал, ай гьев цӏалараб, гьес лъугӏизабураб школалъул музеялда хасаб бакӏги букӏине буго гьесул гьунар бихьизабулеб.
Мухӏамад Тӏайгибов,
Ругъелда школалъул директор