21 цӏалдохъанасе щвана 100 балл
Исана ЕГЭялъул хӏасилал квешал гьечӏо
Артём Здуновасул нухмалъиялда гъоркь тӏобитӏараб Дагъистаналъул хӏукуматалъул данделъиялда 2019 соналъул ЕГЭялъул хӏасилал гьаруна. Аслияб кӏалъай гьениб гьабуна ДРялъул лъайкьеялъул министр – ДРялъул вице-премьер Уммупазил Гӏумаровалъ.
Министралъул баяназда рекъон, 2019 соналда ЕГЭ кьуна 12 452 выпускникас ва ГИА – 23 992 цӏалдохъанас. Экзаменал тӏоритӏана 68 хасаб пункталда. Жеги анлъго пункт гӏуцӏун букӏана загӏипаб сахлъи бугел цӏалдохъабазе. Онлайн режималда хӏалтӏулеб букӏана 985 аудитория ва сахлъи загӏипал лъималаз экзаменал кьолеб 34 аудиториялда лъун рукӏинчӏо видеокамераби. Экзаменазул заманалда хӏалтӏулев вукӏана 4386 чи. Цӏалдохъабазул тӏадкъаязул халгьабуна 465 экспертас (гьезда гьоркьоса 13 ккола федералияв эксперт) ва экзаменазда хадуб халккуна 229 жамгӏияв чияс, гьезда гьоркьоса 85 вукӏана федералияв наблюдатель.
У. Гӏумаровалъ бицана цӏалдохъабиги гьезул эбел-эменги экзаменазде хӏадуриялъул, ай гьезулгун гара-чӏвариял ва дандчӏваял тӏоритӏиялъул хӏакъалъулъги. Гьел тадбиразул хӏасилалда исана цӏикӏкӏана, адабияталъул хутӏизегӏан, киналго экзаменазул гьоркьохъеб балл. «Масала, гӏурус мацӏалъул экзаменалъухъ 80-ялдаса цӏикӏкӏун балл щвана 1748 выпускникасе, профилияб математикаялъухъ – 103 выпускникасе. Гьединго 21 цӏалдохъанасе щвана батӏи-батӏиял экзаменазухъ 100 балл (гьезул хӏалтӏабазухъ цӏидасан халгьабуна Рособрнадзоралъул вакилзабаз).
2019 соналда 873 выпускникасе кьуна «За успехи в учении» абун тӏад хъвараб цӏияб формаялъул аттестат (гьелда рекъон кьола меседил медальги). Аттестат щвечӏого хутӏана 825 цӏалдохъан. Хьул буго, сентябралда цӏидасан экзаменалги кьун, гьезул къадар жеги дагьлъилин», — ан бицана министралъ.
ДРялъул Халкъияб Собраниялъул председателасул заместитель Елена Ельниковалъ кӏвар буссинабуна экзаменал кьезе ругел цӏалдохъабазулгун ва гьезул эбел-инсулгун психологиял гара-чӏвариял гьаризе ккеялде. Гьелъ абуна, цӏалдохъаби хӏинкъулел ругин тӏаде щолел ругел экзаменазукьа ва гьелдалъун чорхол сахлъиялъе зарал гьабизе рес бугин абун.