Гӏемерисел умумуз учительзабазде тӏаде рехун тола жидерго лъималазул пагьму цӏикӏкӏинабиялъул суал. Гьезда ракӏалдеги ккола школалде иналде лъималгун хӏалтӏизе кколарин ва гьезда щибго жоги бичӏчӏуларин.
Умумузда ккола цого-цо цӏалун бажарани ва лъикӏал къиматал росани лъималазе гӏунги тӏокӏаб бугин. Амма нилъеда бихьула гьабураб къоялдаса нахъе лъимер берцинабщиналде балагьулеб, хӏеренаб гьаркьихъ гӏенеккулеб ва кьер берцинал расанкӏабигун расандулел рукӏунел.
Умумузда тӏадаб буго жидерго лъимер, гьабураб къоялдаса нахъе берцин бихьизеги, гьеб берцинлъи загьир гьабизе ругьун гьабизеги. Искусство буго дунял бичӏчӏи, лъай. Лъикӏаб буго лъималазе берцинго, хӏеренго ахӏулеб кечӏцин биччазе. Къуръан цӏалулеб гьаркьихъ гӏенеккизе тӏамизеги ккола гьел. Гьезие рицине ккола маргьаби. Ругьун гьаризе ккола квешаб-лъикӏаб батӏа бахъизе ва ритӏухълъи кидаго бергьунеблъи биччӏчӏизабизе. Лъимералъе сурат бахъизе бокьулеблъи бихьани, росизе ккола краскаби, фломастерал, кьер-кьерал къалмал ва къваригӏараб алат.
Гӏемерал лъимал рихьана гьитӏинаб къоялдасаго умумуз батӏи-батӏиял кружоказдеги рачун, гӏураб мехалъ жидеего гӏумру гьабиялъе бигьаго нух батарал. Гьединал лъимал сундасаго хӏинкъуларо, жидедаго сверухъ кидаго бурцинлъи гӏуцӏулел рукӏуна. Дир ясалъулги руго гьединал гьудулзаби. Масала, Жамиляца бицана гьитӏинаб къоялдаса нахъе эбелалъ жий лъабго сон тӏубралдасаго ячанила гӏемерал кружкабазде: сурат бахъиялъул, кьурдиялде, кечӏ ахӏиялде, пианиноялда бакънал рачине ва гьелда тӏадеги спортивиябгун квен гьабиялъул кружоказдеги.
«Гьитӏинаб мехалда дун йикӏана цӏакъ кӏвахӏалай яс. Эбелалда абулаан щай дун лъималгун рагьда тира-сверизе толарейин. Дихъ гӏенеккичӏо эбел ва щибаб къоялъ, бихьизабураб низамалда рекъон, киналниги кружоказдеги ячана. Кӏудияй гӏедал, школалда цӏалулеб мехалда диегоги бокьана гьение хьвадизе», — ян бицана Жамиляца.
Жакъайин абуни гьелъул буго истаграмалда бокьарав чи бахилаб гьумер. Гьелъ букъула ретӏел, гьабула батӏи-батӏияб квен, тортал, рукъула лъилго гьечӏел гӏадал сумкаби, рахъула берцинал суратал, бачуна пианино. Гьелда тӏадеги Жамиля щвечӏеб пачалихъги хутӏичӏо. Гьелъ жакъа баркала кьола эбелалъе жиндир заманалда гьабураб тӏалабалъухъ. Гьелъ тӏадчӏей гьабичӏебани жиндир гьадинаб гӏумру букӏинароанин бицана Жамиляца. Дагъистаналдаги руго лъималазе киналго шартӏал чӏезарун: суратал рахъулезеги, кечӏ ахӏулезеги, кьурдизе бокьаразеги, шагӏил тӏагӏелал гьарулезеги ва цогидалги махщелал лъазаризеги. Гьедин букӏин бихьана гьал къоязда Махӏачхъалаялъул анлъго искусствоялъул школаз гӏахьаллъи гьабураб, Москваялъул миллатазул рокъоб тӏобитӏараб халкъазда гьоркьосеб лъималазул къец араб куц бихьидалги. Лъебергоялдаса цӏикӏкӏун лъималаз рахъарал суратал ран рукӏана, Франциялдаса, Китаялдаса, Белоруссиялдаса, Италиялдаса лъималазул суратазда цадахъ, Москваялъул кӏудияб кӏалгӏаялъул къадада.
«Хӏакъикъат» газеталъул мухбир, ДРялъул кидагосеб вакиллъиялда цебе гӏуцӏараб жамгӏияб советалъул СМИялъул комиссиялъул председатель Патӏимат Расуловалъ данде гьарун рукӏана, конкурсалъул хӏасилалда бергьарал, Махӏачхъалаялъул лъималазул централъул №8 искусствалъул школалъул, республикаялъул «Центр одаренных детей» школа-лицеялъул, «Жизнь без слез» абураб сакъатазе кумек гьабулеб регионалияб централъул, канлъукъазул школа-интернаталъул, гӏинда бакӏал лъималазул школалъул лъималазул хӏалтӏаби. Гьел суратал рахъулел школазул мугӏалим Муслим Хавчаев ккола РФялъул лъайкьеялъул хӏурматияв хӏалтӏухъан ва гьес гӏемераб хӏалтӏиги гьабула лъималазда суратал рахъизе малъулаго.
«Дун цӏакъ вохарав вуго Махӏачхъалаялъул лъималазул халкъалда гьоркьосеб къецалда гӏахьаллъи гьабизе щвеялдаса. Эбел-инсуда тӏадаб буго лъимал цо сунде ругониги руссинаризе, гьезулъ тӏатараб гьунар цебетӏезабизе. Дихъеги рачӏуна сурат бахъизеги хӏатӏул батӏ-батӏиял тӏагӏалаби гьаризе ругьунлъизеги бокьарал гӏемерал лъимал. Хӏатта рачӏуна кӏиго-лъабго сон баралцин. Гьелгун хӏалтӏизе захӏматго букӏаниги, дида бихьула щибаб дарсидаса хадуб гьезул гьурмал гвангъулел куц. Цо кинаб бугониги гьунар гьечӏел лъимал рукӏунаро. Аслияб жо буго гьезулъ бугеб гьунар-махщел тӏатинаби ва гьел цо рахънире ккезари, ай лъималазда гъола куркьбал», — ян бицана Муслим Хавчаевас.
Москваялда тӏобитӏараб гьеб къецалде рачӏун рукӏана Франциялдаса гӏахьалчагӏиги, хасго гьеб проект гӏуцӏарай Стефани Гаспар. Гьей ккола We are the World evehts ассоциациялъул президентги, ЮНЕСКОялъул вакилги.
— Нижеца цогидалги пачалихъазда тӏоритӏана гьадиналго церелъеял. Дун цӏакъ разияй йиго, нижер гьариги къабул гьабун, Дагъистаналъги лъикӏаб гӏахьаллъи гьабиялдаса. Гьаб буго цогидалги улкабазда тӏобитӏизе ракӏалда бугеб проект. Махӏачхъалаялдаса рачӏарал суртал росизе руго нижеца Франциялда тӏобитӏизе бугеб выставкаялдеги. Нилъеда бихьана гьанире рачӏарал лъималазул букӏараб рохел, гьез цоцадехун бикьулеб букӏараб ургъел, гьаниб лъималаз лъай-хъвайги гьабуна.
Гьаб тадбиралда гӏахьаллъизе ахӏун рукӏана Москваялъул лъимал ругьун гьурулел школазул нухмалъулелги. Гьезги бицана жидецаго гьабулеб хӏалтӏулги, ругел ресазулги, церечӏарал масъалабазулги. Дица рикӏкӏуна данделъи анин цӏакъ пайдаяб къагӏидаялда. Нижеца церелъурал масъалаби тӏуразаруна», — ян бицана Стефани Гаспарица.
Гьеб данделъиялда гӏахьаллъи гьабуна ва кӏалъазе рахъана спилс-картаялъул халкъазда гьоркьосеб федерациялъул президент Евгений Тюриков, Китаялъулгун Белоруссиялъул вакилзаби, художниказулгун бухьен гьабиялъул идараялъул председатель, жамагӏатчи Александр Путин. Гьениб кӏудияб гӏахьаллъи гьабуна Москваялда бугеб дагъистаниязул «Намус» централъул цӏалдохъабазги гьелъул директор Парсихӏат Муртазагӏалиевалъги.
Гьениб лъималал кьурдана, рикӏкӏана батӏи-батӏиял мацӏазда кучӏдул.
Выставкаялъе лъикӏаб къимат кьуна ва батӏи-батӏиял даражабазул дипломазе мустахӏикълъана гьеб кинабго гьабизе хӏаракат бахъарал Стефани Гаспарие ва гьал мухъазул авторалъе.