31 октябралда «Хӏакъикъат» газеталда тӏобитӏараб дандеруссиналда гӏахьаллъана ДРялъул информатизациялъул, бухьеналъул, массовиял коммуникациязул министр Сергей Снегирев, промышленносталъул ва энергетикалъул министр Сайгидпаша Гӏумаханов, финансазул министр Юнус Сагӏадуев, республикаялъул миллиял газетазул редакторзаби.
Гьел данделъиялъе гӏиллаги букӏана «Хӏакъикъат» газеталъул редакторасул ишал тӏуралевлъун тӏамурав Гӏумахан Гӏумахановасда хъулухъ барки ва жакъа миллияб прессаялъул бугеб ахӏвал-хӏал загьир гьаби.
Гьениб Сергей Снегиревас бицана миллияб пресса цебетӏеялъе, газеталгун журналал заманалда гӏадамазухъе щвеялъе гьабулеб бугеб хӏалтӏул хӏакъалъулъ.
«Хӏакъикъат» газеталъул бетӏерав редакторасул ишал тӏуралев Гӏумахан Гӏумахановасги бицана редакциялъул хӏалтӏул, гьаризе ругел ишазул. Амма миллияб газета цӏунун хутӏиялъе ва гьеб цебетӏеялъе цадахъ рекъон хӏалтӏизе кколинги абуна гьес.
Сайгидпаша Гӏумахановас жиндирго кӏалъаялда кӏвар кьуна миллиял газетал цӏуниялъе квербакъизе ккеялде.
Юнус Сагӏадуевас абуна финансазул министрство хӏадурго бугин СМИязул материалиябгун техникияб рахъ лъикӏлъизабиялъе бажарараб кумек гьабизе.
Гьединго дандчӏваялда гӏахьаллъана ДРялъул Хъвадарухъабазул союзалъул правлениялъул председатель Мухӏамад Ахӏмадов, Халкъаздагьоркьосеб Шамил имамасул цӏаралда бугеб фондалъул председатель Гӏалиасхӏаб Хархачаев ва цогидалги. Дандеруссиналъул ахиралда Гӏумахан Гӏумахановас гьалбадерие баркала загьир гьабуна ва абуна газета магӏарулазе бокьулеблъун лъугьинабизе кӏвараб хӏаракат бахъизе бугилан.
Дандчӏваялъул хӏакъалъулъ нижеца гӏатӏидго бицине буго хадусеб номералда.