Я, дир вас! Дуца Аллагьасукьа хӏинкъаразул гурони квенги кванаге ва гӏакълуги дандбай хӏакъикъиял гӏалимзабазулгун.
Дуца гьалмагълъи гьабе Аллагьасукьа хӏинкъаразулгун. Мунагьал гьарулезулгун гьалмагълъи гьабуге. Гьезде гӏазаб-гӏакъуба щвезе бегьула ва гьеб мехалда цадахъ дудеги щола балагь.
Мун вукӏа лъикӏал чагӏазе лагълъун, киданиги квешазе гьудуллъун вукӏунге.
Мун тушманасдаса рикӏкӏалъе, гьудуласдасан цӏодорлъиялдаги вукӏа.
Балъгояб жо бахчун толев чиясулъ букӏуна лъикӏлъи.
Мун гӏалимзабигун гьудуллъиялда вукӏа ва гьезулгун дагӏба-къецги гьабуге. Дунялги тӏубанго реххун тоге, тани пакъирав, чияр горбода ваччаравлъун лъугьуна. Цо-цо къоялъ дуца кӏал ккве, дурго шагьват бекизабун, дурго как-гӏибадаталъе зарал кколеб хӏалалъ кӏалги ккоге, как бай кӏал кквеялдаса хирияб бугелъул.
Я, дир вас, хӏусудчиясул лъабго гӏаламат буго. Аскӏов гьечӏеб мехалъ гьудуласде гъибат гьабула, вихьараб мехалъ хӏелхӏедула, дуде балагь щвараб мехалъ вохула.
Дуца лъикӏлъи гьабе гьелъул агьлуялъе, дуца гьеб гьабуге агьлу гурезе, мун дунялалда гьездасан щибго пайда щвечӏого чӏового хутӏила ва ахиралда кириги щвеларо. Мун вукӏа гьоркьохъевлъун, исрапчилъун вукӏинчӏого, ай мун бахиллъунги чӏоге, исрап кколеб хӏалалъги харж гьабуге.
Мун чияде хӏажалъуларедухъ вукӏа.
Жинда гьеб бичӏчӏулев чиясе гурони лъикӏлъи гьабуге.
Дунял буго нилъеца толеб нух, дуца гьеб къотӏе, гӏуцӏизе лъугьунге.
Мун дунялалде вачӏараб къоялдаса нахъе гьеб дудаса лъутулеб буго, ахират данде бачӏунеб буго. Хӏакъикъаталдаги мун дуда данде бачӏунеб рокъове гӏагарав вукӏуна, дудаса лъутун унеб рукъалдасаги.