Гьанже ругел ясаца къабул гьабе дир салам

Магь баччизе гьод гурел, гьир баччизе жан гурел,

Мугъзада гӏеретӏ чӏвачӏел, чӏар щибали лъаларел,

Лъаларин, кӏоларилан кӏалдиб рагӏи ругьунал!

Гьанже ругел ясаца къабул гьабе дир салам,

Рахьги хӏанги бокьулел, бокьалъул махӏ рихарал,

Гӏака бечӏчӏизе ккани, рачӏ кквезе мун тӏамулел,

Нагагь хӏалтӏи малъани. мугъзалъе гьури кколел,

Гьанже ругел ясаца къабул гьабе дир салам

Бихьанщинаб бокьулел, бокьанщинаб гьабулел,

Бугеб рахӏат гӏоларел, гӏарцул къимат лъаларел,

Къваригӏараб жибго тун тезе ккараб гьабулел,

Гьанже ругел ясаца къабул гьабе дир салам.

Росасул адаб гьечӏел, эбел- инсул кӏвар гьечӏел,

Пигура хвелин хӏинкъун, лъимадуй керен кьечӏел,

Киниялда лъимер лъун сонек чӏван бажаричӏел,

Гьанже ругел ясаца къабул гьабе дир салам.

Магӏарул гӏадат рехун, гӏурус гьабун хьвадулел,

Рахьдал мацӏ кӏочене тун, чидар лъазе гьабулел,

Щибаб лага тӏатине, тӏад къараб ретӏел ретӏун,

Рихьизелъун хьвадулел, ясаз босе дир салам,

Гӏундузде ток бачунел, телалъ рокьи гьабулел.

Кигӏан бокьичӏониги, къабул гьабе дир салам.