РФялъул Цӏех-рехалъул комитеталъул ДРялда бугеб управлениялъ ккуна Каспийск шагьаралъул судиясул кумекчи Гӏабдусалам Мухӏамадов.
Гьесде гӏунтӏизабулеб буго ришват босиялъул мурадалда такъсирчагӏазул къокъа гӏуцӏиялъул гӏайиб.
Гьединго ккун руго Южно-Сухокумск шагьаралъул бетӏерасул вукӏарав заместительги архитекторги.
Цӏех-рехалъул комитеталъ информалатазе кьураб баяналда рекъон, Каспийск шагьаралъул судиясги гьесул кумекчи Гӏабдусалам Мухӏамадовасги хехго бечелъиялъул мурадалда, гӏуцӏун буго ришватал ракӏарулел такъсирчагӏазул къокъа.
2019 соналъул маялдаса сентябралде щвезегӏан кинабниги микьго нухалда ришват босун бугин гьел кӏиязгойин хъвалеб буго баяналда. Гьеб къагӏидаялъ гьез бакӏарун буго 50 000-ялдаса бахъараб бащдаб миллионалде щвезегӏан гӏарац.
Гьединго 13 февралалда бачӏараб баяналда рекъон, ккун руго Южно-Сухокумск шагьаралъул бетӏерасул заместитель Шахсин Мирзоевги шагьаралъул архитектураялъул нухмалъулев Тимур Абакаровги. Гьезде гӏунтӏизабулеб буго хъулухъалдаса пайдаги босун, шагьаралъул бюджеталъе зарал гьабиялъул гӏайиб. Гьел кӏиялго жанир тӏамун руго.
Цере жанир тӏамун рукӏарал хӏакимзабазул рахъалъанги цӏияб хабар лъана 13 февралалда.
Республикаялъул ФОМСалъе, гьединго Махӏачхъала шагьаралъе нухмалъи гьабулев вукӏарав Мухӏамад Сулейманов къватӏиве виччана республикаялъул Верховный судалъул хӏукмуялда рекъон, 13 февралалда. Судалъ гьединаб хӏукму гьабун буго республикаялъул МВДялъул следователасул ходатайствоялда рекъон. Гьев къватӏивеги виччан вуго лъабго моцӏрол болжалалда кинал рукӏаниги ишал гьаризеги гьукъун.
Гьединаб хӏукуму гьабиялъе гӏиллалъунги ккун буго 17 февралалда гьев туснахъ гьавиялъул болжал лъугӏулеб букӏиналда бан.
Сулейманов ккун вукӏана 2018 соналъул августалда.