Араб анкьида Авартеатралъул тӏоцебесеб сапар букӏана Казбек районалде. Лъималазе ва чӏахӏиязе хӏадурараб кӏиго спектакль бихьизабуна актераз Дилим росдал культураялъул кӏалгӏаялъуб. ДРялъул мустахӏикъав артист Нурмухӏамад Нурмухӏамадовас сценаялда лъураб «Навруз» спектакль кӏудияб рохелгун къабул гьабуна Дилим росдал лъималаз. Режиссерас спектакль гӏуцӏун, букӏана жалго лъималазги жигараб гӏахьаллъи гьабулеб хӏалалъ аваданго.
Гастролазул къасисеб программаялда бихьизабуна РФялъул мустахӏикъав артист Мухӏамад Нурмухӏамадовас сценаялда лъураб «Мун йиго дир эбел» абураб спектакль. Нилъер гӏумруялъул жакъасеб хӏакъикъаталда рекъараб, гӏадан рекӏеда ватизавулеб ва ургъизе тӏамулеб гьеб спектаклялъ гъваридаб асар гьабуна балагьаразе.
Дилималъул гӏисиназгун чӏахӏияз ракӏ-ракӏалъулаб баркала загьир гьабулеб букӏана Авартеатралъул актеразе жидехъе гьоболлъухъ рачӏаралъухъ.
ДРялъул Культураялъул министерствоялъул «Мастера сцены жителям Дагестана» абураб проекталда рекъон гӏуцӏун буго исана Авартеатралъ жидерго хӏалтӏиги.
Магӏарул театралъе кьучӏ лъуралдаса 85 сон тӏубалеб гьаб юбилеялъулаб соналъ гьез хӏисабалде босун буго киналго мугӏрул районазде щвезе.