Дол церегӏанго соназ дир гьудул, магӏарулазул шагӏир Гӏирбанил Хӏажияс жиндирго «РАФИК» машина кьун букӏун буго гӏагарав васасухъе, гьес жиндиегоги гьасиеги, гьелда гӏадамалги раччун, гӏарац гьабизе къотӏигун. Амма шоперас дир гьудул махсараде ккун вуго, щибаб моцӏрое къотӏи гьабураб гӏарацги кьечӏого.
Гьеб рагӏарав гьесул вацгӏалас абун рагӏула «Рождённый ползать летать не может…», — абун.
Хӏажиясда гьеб бичӏчӏун буго ва гьев вацгӏаласухъе хӏалтӏизабизе кьун буго добго «РАФИК» добго гӏарац кьезе къотӏиялда.
Цевесев кӏочарав ватун вуго Хӏажиясда кӏиабилевги гӏагарав чи, гьаб-доб багьанаги бачун, цонигияс гьасие къотӏи гьабураб гӏарац кьун гьечӏо ва жиндир иргадулаб тӏехь бахъизе рукӏарал шагӏирасул хьулал хӏор-лъун руго.
Гьезда ццин бахъарав шагӏирас босун буго хъахӏаб ххамил щуго-анлъго метрги ва гьелда тӏад художникасда берцинго ва чӏахӏиял хӏарпаздалъун хъвазарун руго, бахъизе ракӏалда букӏараб жиндирго тӏехьалдаса росарал, гьал рагӏаби:
Эбел кӏочарасе – кӏиго нагӏана,
Налъи кӏочарасе – лъабго нагӏана! — ян.
Аскӏобго бахъизабун буго «РАФИКалъул» суратги, гьеб лъие ва сундуе хъвалеб бугебали росуцоязда бичӏчӏизе букӏинелъун.
Гьеб игӏлан чӏван буго жиндирго росулъ бугеб минаялъул нухдехун буссараб рахъалда, киназдаго бихьуледухъ.
Гьеле гьедин «тамихӏ» гьабун буго шагӏирас жиндирго налъулазе.
P.S.
Гьечӏищха, гьудулзаби, къватӏ-къватӏазда чӏахӏахатӏалъ хъван рукӏине кколел рагӏаби?
Гьал мухъал цӏали-далгӏаги цо-цо налъи кьоларел чагӏазда яхӏ речӏчӏилародай?