Магӏарухъ нижер росулъ жанире щвараб бакӏалда рукӏана цебе росдаца иргаялда лал тӏамулел гьоцӏаби, хадуб машинадул нух росулъе бахъидал, лал тӏамулебги тедал гьенир нижер колхозалъул юк баччунел машинабиги, цогидаб техникаги букӏунаан чӏезабун.
Дол лъабкъоялда анцӏабилел соназ гъутаналдаса магӏарухъе баччулеб ролъги, херги, кӏалцӏиги камулароан колхозалъул. Магӏарухъа рехеги гьел машинаби чӏорого унароан, хасго хаслихъе хур-хер жаниб буссиндал. Гӏатӏиракьалда чӏараб гӏагарлъиялъе ритӏулел картошкадул хъапазул гӏемериселъ цӏун унаан гьел. Гьитӏинабго ГАЗ-51 машинаялъ кӏиго тоннагӏанасеб гурони бакӏлъиги босулароан. Районалда базаралдеги гӏатӏиракьалдеги гӏемериселъ гьел машинабазда рекӏун унаан гӏадамал. Рукӏинчӏо гьадин бокьухъе рекӏине тӏадагьал машинаби.
Гьединаб цо машинаялда хӏалтӏулев вукӏана, армиялдаги шоферлъун хӏалтӏулев вукӏарав, жиндир хӏал алжаналда батаяв дир гьудул Хъиличил Идрисги.
Цо пуланаб Агъвалиб, базар букӏунеб шамат къоялъ, капотги рагьун, машинаялъул
мотор букӏунелъув квалквадулев гьесда аскӏое ячӏуна Агъвали базаралде ине бокьарай, кӏудияб ригьалъул росуцояй ва гьелъ Идрисида гьикъула:
— Ле вас, мун жакъа Агъваливе ине вугищ? — ан.
— Гьечӏо.
— Щай? Шамат къоялъ базаралде унаан гурищ мун.
— Дуда вихьуларищ дун, машина хун, гьеб къачӏалев?
— Щиб гьелъул хун бугеб? – ан гьикъула хӏамида къулгьугӏанги машинаялъул жо лъаларей дой херай кӏодоца.
— «Бардачок», — ан абула махсаро камуларев Идрисица.
Тӏокӏаб рагӏи гьесдаги абичӏого, нахъ юссун унаго, Идрис жакъа унев гьечӏин Агъваливе, досул «бардачок» хун бугин данде ккараздаги бицунаго, рокъое уна, гьеб къоялъ рагӏараб цӏияб рагӏи лъарай кӏодо.