• Хъулухъалда вукӏаго ракӏалда чӏезабе кӏиго хӏакъикъат: «Ритӏухълъиялъулъ загьирлъула гӏакъиллъи. Хъантӏи гьечӏолъиялъ борхизабула къадру». Рокъове тӏадвуссиндалги ракӏалда чӏезабе кӏиго хӏакъикъат: «Рази-ракиго вукӏиналъулъ батула рахӏат. Цӏуна-къаялъ гьарза гьабула буголъи».
• Бугьтанчагӏи релълъуна бакъалда цебе бачӏараб накӏкӏуда: гьезда гӏемераб мехалъ бахчизабизе кӏоларо лъикӏлъи. Хӏелхӏелчагӏи релълъуна тӏеренабго гьорол хӏухьлада: гьел аскӏоса тӏагӏараблъиго лъаларо.
• Къабихӏав чиясулгун тушманлъи гьабуге, жиндаго релълъарал рукӏуна гьесул тушбабиги. Сахаватав чиясе хӏелхӏедуге, гьес хасаб мурадалъе гӏоло лъиего кумек гьабуларо.
• Живго жинцаго веццулев чи вуго жиндиего зарал гьабулев чи.
• Гьудуласухъе индал, гьесул лъималаз бицуна дуда мун гьесие хӏажат вугищ яги гьечӏищали. Лъимал данде рортун рачӏани, гьудулас дур хӏурмат гьабулеб буго. Рачӏинчӏони, гьудуласе мун вихьизецин бокьун гьечӏо.
• Воре, зинаялдаса рикӏкӏад чӏа. Гьеб байбихьула пахрулъиялдаса ва чохьое бокьа-бокьараб гьабиялдаса, амма лъугӏула язихълъиялде ккеялдалъун.
• Лъикӏаб квен бугони — гьалбал гӏемерлъула, гӏемераб бечелъи бугони – гьудулзаби цӏикӏкӏуна. Амма мун гӏодов ккараб къоялъ гьел дуда ратуларо.
• Хӏалтӏичӏого бетӏербахъи гьабизе бокьиялъ гьерсихъанлъун ва цӏогьорлъун лъугьинавула.
• Къанцӏаялъ гьоцӏо пасат гьабулеб гӏадин, квешаб тӏабигӏаталъ гӏамалги пасат гьабула.
• Гӏадлу гьечӏеб мацӏ нилъедаго данде хӏалтӏула.
• Мун гӏадамазда гурхӏа, гьеб мехалда Аллагь дудаги гурхӏила.
• Талихӏ бокьун батани, щайтӏан къезабизе ккола.
• Воре, кӏочон тоге дунялалда гӏунги тӏокӏ заз букӏин. Амма гьелда тӏад гӏодов чӏезе лъидаго тӏадаблъун гьабунги гьечӏо. Дуда цадахъ дуе мутӏигӏаб гъалбацӏ батичӏони, воре, дуца гьабзазда ганчӏал речӏчӏуге.
• Захӏмалъи бихьарасда жиндирго бакӏ батула, цӏамул гьир чӏикӏарасда гьацӏул къиматги лъала.
• Гӏемер гӏодизе ккарав ракӏ-ракӏалъго ве-лъула.
• Хвел нахъа букӏин лъалес лъикӏлъиялъ хур бекьула.
• Унесе квалквалги гьабуге, вачӏарасе нодоги букӏкӏунге.
• Лъикӏав чиясул тушманлъун вукӏин лъикӏ, квешав чиясул гьудуллъун вукӏиналдаса.
• Рос-лъади рукӏине ккола квераллъунги бераллъунги. Кверал унтулел ругони — берал гӏодула, берал гӏодулел ругони — квераз магӏу бацӏцӏуна.
• Бусада вегун вугев киданиги гӏодов кколаро.
• Гӏантав чиясе кидаго нух кьезе ккола.
• Бажарарабщинаб гьабе, хутӏараб Аллагьасде тӏамун те.
• Релъи-хъуй бугеб рокъобе бачӏуна талихӏ.
• Гьимулеб гьурмада чӏор речӏчӏуларо.
• Къулизе хӏинкъичӏони, витӏун чӏезе бигьалъула.
• Гӏакъилас авалалдасан байбихьула, гӏабдалас ахиралдасан байбихьула.
• Инсанасда кӏола гӏодизеги велъизеги. Инсанасухъ буго бокьараб тӏаса бищизе ихтияр.
• Барщараб пихъ гӏемераб мехалъ цӏунун хутӏуларо.
• Гӏемераб жо буго рекӏеда гурони, беразда бихьулареб.
• Нилъеца гьабулеб лъикӏаб иш квешлъия-лъеги батула.
• Рахӏатаб гӏумру бокьун батани, чияца гьарилалде гьесие лъикӏлъи гьабизе гӏедегӏуге.