— Я, дир гьудул Гӏалихан,
Гӏумруги чӏалгӏун буго,
Гӏадада заман ине
Диеги бокьун гьечӏо.
Дун гӏадинал ясазул
Россал руго бечедал,
Мунго кинав гьардухъан
Гьикъун кӏалгун вачӏарав?
— Юцӏцӏун йикӏа, хирияй,
Халикъасдаса неча,
Хинаб квен гьечӏого мун
Кидагӏаги йикӏарай?
Бокьоб гӏакаги буго,
Гӏурдада хурги буго,
Хасалица кваназе
Картошка бачӏун буго.
— Кваназе квен гьечӏого,
Цохӏониги чи гьечӏо,
Чияр машинабазда
Кидалъагӏан хьвадилей?
Дун гӏадинал ясалаз
Джипал руго рекӏунел,
Россабаз бахшишалъе
Босун буго гьезий кьун.
— Хирияй, цо квералда
Килщал ращадал гьечӏо,
Киналго гӏолилазул
Джипалги рукӏунаро.
Ракӏ рагьарав дун дуе
Маян кьурав гӏоларищ,
Гӏамал сураралщинал
Щола цойги ясазе.
— Вай, лъаларо, Гӏалихан,
Гӏамал берцинав инсан,
Унго-унгояб талихӏ
Кинабдаян йикӏуна.
Кӏваричӏо дий Джипалги
Кӏудиял кӏалгӏабиги,
Кӏалалъ берцинаб рагӏи
Бицунев мун вокьила.
— Гьелеха, дир хирияй,
Дуда гьанже бичӏчӏана,
Бетӏергьанас дуй кьураб
Даран, хазина, талихӏ.
Аллагьас кьуралдаса
Рази йикӏа, хирияй,
Хириял гьитӏичалгун
Гӏуцӏе талихӏаб гӏумру.