10 марталда Махӏачхъалаялда бугеб Северияб Кавказалъул гуманитарияб колледжалде ракӏарун рукӏана халкъазда гьоркьосеб имам Шамилил фондалъул вакилзабигун жамгӏиял хӏаракатчагӏи.
Гьениб бицана гъоркьиса Шамилил фондалъ гьабураб хӏалтӏул хӏасилазулги исана цере чӏарал масъалабазулги хӏакъалъулъ.
Гьеб тадбир тӏобитӏизе гуманитарияб колледж тӏаса бищиялъе гӏилла ккола гъоркьиса гьелъие кӏудияв Имамасул цӏар кьей. Республикаялда ругел цӏалул идарабазда гьоркьоб цохӏо гьелъие гурони жеги Шамилил цӏар кьун гьечӏо.
Гьабураб хӏалтӏул бицунаго, фондалъул нухмалъулев Гӏалиасхӏаб Хархачаевас абуна гъоркьиса Тулаялда, Калугаялда ва Москваялда Шамилил фондалъул филиалал рагьанилан. Гьединабго филиал Турциялда рагьизеги кинабго хӏадурун бугин кӏалъана гьев.
Гьединго филиал букӏине рагӏула Украинаялдаги.
Гӏун бачӏунеб гӏелгун рикӏкӏен гӏемерал дандчӏваял тӏоритӏизе щвеялдасаги разиго вуго Гӏ. Хархачаев. Дагъистаналда ислам щула гьабизе ва хадусел наслабазе гьеб бацӏцӏадго цӏунизе лъица гъазаваталъе гъуждул гурун рукӏаралали кӏочон тезе бегьуларин гӏун бачӏунеб гӏелалдаян абуна гьес.