Гьал къоязда республикаялде вачӏун вукӏана Россиялъул президентасул Северияб Кавказалъул федералияб округалда вугев вакил Юрий Чайка. Дагъистаналъул хӏукуматалъул минаялъув гьев дандчӏвана республикаялъул жамгӏиял гӏуцӏабазул нухмалъулелгун.
Президентасул вакиласе лъазе бокьун букӏана Дагъистаналда ругел жамгӏиял гӏуцӏабазул хӏалтӏи кин унеб бугебали, цӏех-рех гьабуна республикаялда бугеб политикиябгун экономикияб ва жамгӏияб ахӏвал-хӏалалъул, Россиялда кколел ругел политикиял лъугьа-бахъиназда тӏасан дагъистаниязул бугеб пикруялъул.
Данделъиялда гӏахьаллъарал республикаялъул жамгӏиял гӏуцӏабазул нухмалъулел Елена Павлюченкоца, Интизар Мамутаевалъ, Зикрула Ильясовас, Гӏайшат Хӏамзаевалъ ва Мустӏапа Билаловас загьир гьаруна республикаялда ва улкаялда кколел ругел хиса-басиязда тӏасан жидерго пикраби.
Юрий Чайкада церелъуна Дагъистаналъул жамгӏияталда, ай Халкъияб Собраниялъул, бакӏалъулал муниципалиял гӏуцӏабазул депутатазда, хъулухъчагӏазда гьоркьор руччабазул къадар дагьаб букӏиналъул, инвалидазе гьабулеб гӏей гьечӏеб кумекалъул, Дагъистаналда жамгӏият цебетӏеялъул хасаб программа гӏуцӏизе ккеялъул, бакӏалъулал кадраби тӏаса рищиялде, гьел хӏалтӏуде тӏамиялде кӏвар кьезе ккеялъул суалал.
Дандчӏваялда хасаб пикру буссинабуна Дагъистаналъул мацӏазул бугеб лъикӏаб гуреб ахӏвал-хӏалалдеги. Хъизамалдасан, лъималазул ахаздасан байбихьун, школазде щвезегӏан гьеб кӏвар цӏикӏкӏараб суалалде тӏаса-масагояб бербалагьи гьабулеб букӏиналъулги бицана гьениб.
Президентасул вакилас бицана цебеги республикаялъулгун жиндирго букӏараб бухьеналъул хӏакъалъулъ. Ва гьес рагӏиги кьуна, цере лъурал суалазухъ рагӏа-ракьанде щун халги гьабун, гьел тӏураялде кӏвар буссинабизе.