Лъабго проект бихьизабуна
15-16 февралалда Сочиялда тӏобитӏана
Россиялъул инвестициязул форум
Гьелда гӏахьаллъана ДРялъул хӏукуматалъул председатель Артем Здуновги, ДРялъул хӏукуматалъул тӏоцевесев министрасул ишал тӏуралев Рамазан Гӏалиевги, ДРялъул экономикаялъулги территориалияб цебетӏеялъулги министр Гӏусман Хасбулатовги, ДРялъул предпринимательствоялъулги инвестициязулги агентствоялъул нухмалъулесул ишал тӏуралев Башир Мухӏамадовги.
Форумалда гӏахьаллъана РФялъул премьер-министр Дмитрий Медведевги. Гьениб цебелъуна Дагъистаналдаса лъабго инвестициязулаб проект: «Каспийск» ТОСЭР гӏуцӏиялъулги, «Макьасда» курортги, «Каспий Плаза» абураб гостиницабазул комплекс баялъулги.
Гьел проектал лъун рукӏана Россиялъул Кавказалъул ишазул министерствоялъул цолъизабураб стендалда. Гьезухъ балагьизе щвана Артём Здуновги. «Каспийск» ТОСЭР проект гӏумруялде бахъинабиялдалъун кьучӏдасанго хисизе буго шагьаралъул экономика. Гьениб букӏине буго 3000 чиясе хӏалтӏизе бакӏ. Шагьаралде бачӏине буго 17 млрд гъуруш инвестициязул.
Каспиялъул рагӏалда базе буго гостиницаялъулаб комлекс. Гьелда гьоркьобе уна 460 рукъалъул 16 тӏала бугеб гостиницаги, ракьулъ жаниб гьабураб автостоянкаги, ательеги, тренажеразул залги, цо чанго бассейнги, ресторанги, клубги, фитнес-СПАги, конференц-залалги, футболалъулги, баскетболалъулги, кӏудияб теннисалъулги спортивиял майданалги, катеразул стоянкаги.
«Макьасда» абураб проекталда рекъон, Хунзахъ районалда базе буго курорт. Гьенир гӏуцӏизе руго гьалбадерие санагӏатал шартӏал.
Артём Здуновас лъикӏаб къимат кьуна форумалда церелъурал Дагъистаналъул фермеразги ва жалго бетӏергьанал предприятиязги хӏадур гьарурал кванил нигӏматазеги.
Артем Здунов гӏахьаллъана батӏи-батӏиял данделъабазда. Гьенирго гьаруна республикаялъул цебетӏеялъе кӏвар бугел къотӏиялги. Масала, ДРялъул предпринимательствоялъулги инвестициязулги агентствоялдаги, Татарстаналъул машинаби ралеб кластералдаги, «ИННОКАМ» абураб «Камскалъул инновациязулаб территориалиябгун производствоялъулаб кластер. Коммерциялъулаб гуреб партнерство» абураб ассоциациялдаги гьоркьоб.
Къойил – цо миллиард гъуруш
Дагъистаналъул цӏияб хӏукумат гӏуцӏиялъул хӏакъалъулъ бицана
ДРялъул бетӏерасул ишал тӏуралев Владимир Васильевасул нухмалъиялда гъоркь тӏобитӏараб данделъиялда гӏахьаллъи гьабуна премьер-министр Артем Здуновасги. Гьениб бицана цӏияб хӏукумат гӏуцӏизе бугеб къагӏидаялъул.
Артем Здуновасул пикруялда, цо-цо министерстваби цолъизаризе руго. «Экономикаялдаги финансаздаги хадуб кьварараб низам букӏине ккола – гьел кӏиялго рахъазул жавабчилъи тӏадкъазе ккола ДРялъул хӏукуматалъул председателасда. Гьебмехалда гьел хъулухъазда тарал хӏакимзаби берзукь рукӏина. Лъикӏаб букӏина, вице-премьерасулги министрасулги хъулухъ цого чияс тӏубаниги – гьелъги цӏикӏкӏинабила жавабчилъи. Республикаялъул бюджеталъул хайиралъулаб бутӏа цӏикӏкӏинабизе ккола. Дир пикруялда, вукӏине ккола хӏукуматалъул председателасул тӏоцевесев заместитель – гьеб рахъалъ жавабчилъи тӏалъула гьесда. Бюджеталъул хайиралъулаб бутӏа цӏикӏкӏани, гӏемерисел социалиял масъалаби тӏуразе бигьалъила», — ян бицана Артем Здуновас.
Владимир Васильевас рехсарал пикрабазул рахъккуна. Гьес ракӏалдещвезабуна, Татарстаналдаги Здуновас гьедин гьабулеб букӏараблъи ва «гьабсагӏаталда гьениб щибаб къоялъ бакӏарула налогазул цо млрд гъурушинги» абуна гьес.
Экономика
Тохтурзабазе харжал цӏикӏкӏинаруна
Унтаразе дарабиги хӏалтӏухъабазе мухьги
заманалда кьезе ккола
ДРялъул Халкъияб Собраниялъул председатель Хизри Шихсагӏидовги, парламенталъул вице-спикер Елена Ельниковаги, сахлъицӏуниялъулги социалияб политикаялъулги комитеталъул председатель Висампаша Хангӏалиевги, депутатал Лейла Керимовги ва Зумруд Бучаеваги щвана Махӏачхъалаялъул №6 поликлиникаялде. Гьезда цадахъ вукӏана ДРялъул сахлъицӏуниялъул министрасул тӏоцевесев заместитель Ферзуллагь Хӏабибулаевги. Гьез халгьабуна поликлиникаялъул, гара-чӏварана унтаралгунги медицинаялъул хӏалтӏухъабигунги.
Гьабсагӏаталда рехсараб поликлиникаялда вуго 57 тохтурги 73 медсестраги. Цо сменаялда гьезухъе вачӏуна 300-гӏанасев унтарав. Хӏалтӏизабулеб буго тохтурасухъе иргаялда цӏар хъвалеб электронияб къагӏидаги.
Январалъул харжалъул аванс гурони кьечӏо жеги тохтурзабазе. Ферзуллагь Хӏабибулаевас абуна, 15 февралалда гьезие щвезе бугин цӏикӏкӏинабураб харж: тохтурзабазе 40 азаргогӏанасеб гъуруш ва медсестрабазеги санитаркабазеги – 20 азарго.