Гӏумруялда кӏудияб къимат бугеб жоялъул хӏакъалъулъ бицунеб мехалъ, пикрабалъе рачӏуна батӏи-батӏиял суратал гӏадамас къиматаблъун рикӏкӏунеб жоялъул. Цоязул гьеб буго цӏияб рукъ, машина, квартира, кӏудияб харж, дуниял бихьизе свери ва гьединго цогидалги. Амма цӏакъго дагьал гӏадамаз гурони гӏумруялда бугеб къиматаб, кӏвар бугеб жолъун рикӏкӏунаро материалиял рахъалъ бечелъи гуреб, инсанасул рухӏияб рахъ, жанисеб тӏабигӏат.
Нилъеда тӏад бачӏараб коронавирусалъгун, пандемиялъ тӏамуна гӏадамал гӏумруялъул къиматалъухъ батӏияб куцалъ балагьизе ва гьединго ургъизе. Тӏолго гӏадамазул гӏумру бикьана. Самоизоляциялда рукӏаго гӏадамас пикру гьабизе байбихьана цебего кӏочон тун рукӏарал жалазул, ва гьединго бичӏчӏана цере рихьулел рукӏинчӏел ва жинца кӏвар буссинабулеб букӏинчӏел, кигӏанги гӏемерал гӏадатиял жал ругел. Гьезда гьоркьоб буго гӏагарлъигун, хъизангун цоцалъ рекъон рукӏин,
Гьединго гӏадатияб, амма цӏакъ къиматаб жо буго гьими. Гьелъ кӏудияб асар гьабула нилъер гӏумруялъе. гьимулев, хӏалхъублъи гьечӏев гӏадангун кӏалъазе батӏияб гъираги рохелги букӏуна. Амма пашманлъизе бачӏуна, дунялалъул магӏишаталда хадур рекерелулел рукӏун, гӏадамаз пикру гьабуларо гьадинаб кӏвар бугеб жоялъул. Къватӏазда, тукабазда, жамгӏиял бакӏазда, гӏемерисел гӏадамал рукӏуна бецӏаб, пашманаб яги цин бахъараб гьумергун. Амма гӏадан жинда аскӏов вугесе гьимараб мехалъ сверухъ бугеб щинаб жо тӏегьазе байбихьула.
Гьединго гӏумруялъул къиматаб жо буго цо-цоязе кумек гьаби.
пандемиялъул заманалъ гӏемераз цо-цоязе, мискиназе, тохтурзабазе кумек гьабулеб букӏана. Гьеб цоцалъ гъункиялъ, щулалъиялъ кумек гьабуна унтиялда дандчӏвай гьабизе.
Гьанже нилъеда лъана нилъер гӏумруялъул хиралъи. Нилъ бищунго гьитӏинаб гӏадатияб жоялдаса рохулел руго. Гьединал рохелазул цояб буго нилъерго гьудулзабигун яги гӏагаралгун тира-сверизе ин, гьелгун дандчӏвай. Цебе гьединаб жо нилъее гьанже гӏадин къиматаблъун букӏинчӏо. Щиб лъугьаниги, кигӏан кӏудиял захӏмалъаби дандчӏваниги нилъеда лъазе ккола гьединаб гӏадатияб жоялъулги хӏикмат букӏин нилъее. Гьанже нилъеда гьеб бичӏчӏинчӏониги, заман араб мехалъ нилъеда лъала гьелъул къимат. Аслияб жо буго жиб-жиб цӏияб къоялдаса нилъ роху рукӏин, захӏмалъаби дандчӏваниги хьул къотӏичӏого рукӏине ва гьединго нилъее Аллагьас кьурал щинал нигӏматазде даимаб щукру гьаби.
Мальвина Мухӏамадова, ДГУялъул, журналистазул отделениялъул, 3 курсалъул студентка