12 октябралда Цӏунтӏа районалъул администрациялъул минаялда ганчӏал речӏчӏана бакӏалъулал гӏадамазул цо къокъаялъ. Гьелдалъун жагъаллъи ккана гьенир цере чӏезарун рукӏарал администрациялъулги районалъул бетӏер Шамил Мухӏамадовасулги машинабазе.
Цӏунтӏа райадминистрациялдаса «Хӏакъикъаталъухъе» щварал баяназда рекъон, гьеб заманалда районалъул депутатаз бакӏалъул собраниялъул нухмалъиялде Исрапил Гӏабдулаев вищулев вукӏана.
Гьелде щвелалде Гӏабдулаев вукӏана районалъул бетӏерасул заместительлъун.
— Районалъул 23 депутатасда гьоркьоса 13 чи гӏахьаллъана сессиялда. Анцӏгоял рачӏинчӏо. Жал гьечӏони, кворумги гӏечӏого, сессия тӏобитӏиларин ккун букӏараб къагӏидаха гьезда. Гьединлъидал лъугьана гьел, администрациялде ганчӏалги речӏчӏун, сессия гьоркьоб къотӏизабизе, — ян бицана газеталъе районалъул пресс-хъулухъалъул нухмалъулев Адам Гӏалиевас.
Гъалмагъир гьабурал депутатазул анкьгояв ккун вугинги тӏаде жубана гьес.
Администрациялде гӏагарав цогиги чияс «Хӏакъикъаталъе» баян гьабуна гьезие тӏалъи жидехъе щвезе бокьун бугилан. Гьединлъидал тӏоцебесеб нух гурила гьез гьединал хӏаял гьарулел ругелдаса.
Цӏунтӏа гьеб лъугьа-бахъин ккун нахъисеб къоялъ, жиндирго разилъи гьечӏолъи загьир гьабун, Махӏачхъалаялъул аслияб майданалде вахъун вукӏана Шаури росулъа депутат Мухӏамад Сагӏидов. Гьесул рагӏабазда рекъон, районалъул собраниялъул бетӏерлъун Исрапил Гӏабдулаев вищулеб данделъиялде риччан гьечӏо. Гьединлъидал Сагӏидовасе бокьун буго гьеб хӏужаялде республикаялъул тӏалъиялъул кӏвар буссинабизе.
Майданалде вачӏун заман иналде гара-чӏвариялъе гьев жиндирго кабинеталде ахӏана ДРялъул бетӏерасул Мугӏрузулаб округалда вугев вакиласул ишал тӏуралев Мухӏамад Камиловас.