«Коронавирусгун къеркьолел ругел медиказе тӏадеги гӏарац кьеялъул кинаб низам бугеб? Лъие ва кигӏан гьеб кьолеб?»

Гьаб суалалъе жаваб кьуна ДРялъул Захӏматалъул ва социалияб рахъалъ цӏуниялъул министерствоялъул хӏалтӏухъан Идрис Мухӏамадовас:

— 2020 соналъул 30 октябралда къабул гьабураб РФялъул хӏукуматалъул № 1762 хӏукмуялда хъван буго коронавирусалъ унтаралгун хӏалтӏулел медицинаялъул хӏалтӏухъабазе гӏарац (выплата) кьеялъул цӏияб къагӏида. Гьелда рекъон, 2020 соналъул тӏоцебесеб ноябралдаса 2021 соналъул 31 декабралде щвезегӏан медиказе тӏаде гӏарац кьеялъул ва гьелъул хӏисаб гьабиялъул низам хисизабуна: гӏарцул къадар бараб букӏуна медикасул хъулухъалда, ай цо сменаялда гьес гьабулеб хӏалтӏуда; ФССалъул реестралде кьуралдаса анкьго къоялдаса кватӏичӏого гьеб гӏарац бачӏуна медикасул карточкаялде. Гьединго, тӏоцебесеб декабралдаса нахъе «Госуслуги» порталалъул кабинеталдасан медикасда лъазабизе буго гьесул карточкаялде гӏарац реханин.

2020 соналъул ноябралдаса байбихьун ДРялъул хӏукуматалъ чӏезаруна коронавирусалъ унтаралгун цо сменаялда хӏалтӏун медиказе тӏаде кьолеб гӏарцул гьадинал роценал:

• больницабазул тохтурзабазе — 3880 гъурущ;

• больницабазул гьоркьохъеб персоналалъе — 2430 гъурущ;

• больницабазул гьитӏинаб персоналалъе — 1215 гъурущ;

• амбулаториязул тохтурзабазе — 2430 гъурущ;

• амбулаториязул гьоркьохъеб персоналалъе — 1215 гъурущ;

• амбулаториязул гӏисинаб персоналалъе — 600 гъурущ;

• паталогоанатомикиял бюроязул хӏалтӏухъабазе — 2430 гъурущ;

• «хехаб кумекалъул» тохтурзабазе — 2430 гъурущ;

• «хехаб кумекалъул» гьоркьохъеб персоналалъе — 1215 гъурущ;

• «хехаб кумекалъул» гӏисинаб персоналалъе — 950 гъурущ;

• «хехаб кумекалъул» ахӏи къабул гьабулел фельдшеразе — 600 гъурущ;

• «хехаб кумекалъул» бригадабазул машинабазул водителазе — 1215 гъурущ.