5 декабралда Гъуниб районалъул Сугъралъ росдал хабалалъ вукъана Кӏудияб Ватӏанияб рагъул гӏахьалчи Муса Маркъулов. 1941 соналда рагъде арав гьесул хабар къотӏун букӏана. Гӏагарлъиялда лъалеб букӏинчӏо гьесул къисмат. Гьеб лъана гӏицӏго 79 соналдасан. Краснодар краялъул Туапсе районалъул Шаумянское росдада аскӏор ратана гьесул рукьбузул хутӏелал.
Муса Маркъуловасе къадар щун буго Шаумянское росдада аскӏоб бугеб 396-абилеб борхалъиялда. 1942 соналъ гьеб бакӏалда унел рукӏарал захӏматал рагъазда, аскӏоб кьвагьараб минаялъул хӏасилалда чӏван вуго гьевги гьесда цадахъ вукӏарав чанго чиги. Гьезул рукьбузда тӏаде ккун руго «Кубаньпоиск» абураб рагъда тӏагӏарал солдатал ралагьулеб отрядазул ассоциациялъул хӏаракатчагӏи.
Муса Маркъуловасул жаназаялъул хутӏелал гьел рукӏинги чӏезабизе кӏун буго, гьенир аскӏорго ратарал гьесул алатазул кумекалдалъун. Солдатасул флягаги, каска-тӏагъурги, рахханги, цадахъ босулеб хьагги ратун руго гьениб. Гьеб хьагида тӏад бикӏун батараб Маркъулов абураб фамилиялъул кумекалдалъун кӏун буго гьев Дагъистаналдаса вукӏин чӏезабизе.
«Кубаньпоиск» къокъаялъул ассоциациялъ бухьен гьабуна Гъуниб районалъул Сугъралъа гьесул гӏага-божаразулгун. Кӏудияв инсул вацасул хутӏелал гӏагараб ракьалде росизе, 2 декабралда Краснодаралде ун вукӏана Ризван Маркъулов. Гьев ккола Муса Маркъуловасул вац Ризванил васасул вас.
1941 соналда рагъде унаго гьесул документазда хъван буго гьев Чӏарада районалъул рагъулаб комиссариаталъ фронталде ахӏанилан. Гьеб мекъаб баян сабаблъун, гьесул цониги кагъатги бачӏун гьечӏо рокъобе.
«Мекъаб адресалда рекъон унел рукӏиналъ нухдаго тӏагӏун рукӏине ккола гьесул кагътал. Краснодаралъул «Кубаньпоиск» къокъаялъулаз гьесул хутӏелал ратун хадубги, хьагида бикӏун батараб цӏаралда рекъон, Мухӏамад Маркъулов абун хъван батана гьесул хӏакъалъулъ. Хӏакъикъаталдайин абуни гьев ккола Муса», — ян бицана Р. Маркъуловас.
Гъуниб районалъул Сугъралъа Ватӏанияб рагъде ун вуго ункъо вац: Ризван, Муса, Гӏумар ва Расул. Муса кколаан кӏиабилев. Гьезул кӏигоял — Мусаги Гӏумарги рагъда чӏвана, цояв вац Расул, доб заманалда дизертирлъи гьабулев ватун Гъунив кквезе щварав такъсирчиги вачун витӏулаго, дизертирасул квердасан хола. Рагъдаса чӏаго вуссана Ризван. Инсул тӏолабго гӏумру анин вацасул къисмат цӏехолагоян бицана нижее гьесул вас Мухӏамадица.
«Эмен, л ъабго н ухалда л ъукъун хадув вуссана рагъдаса. Муса кколаан гьесдаса хадусев, гьесул кагъатцин бачӏинчӏо рагъдаса. Хадусев вац Гӏумарил кӏиго кагъатниги бачӏун букӏана. Амма Мусал къисматалъул щибго лъалеб жо букӏинчӏо. Инсул анищ букӏана гьев вукъараб бакӏгӏаги лъазаби, хутӏичӏо мунагьал чурад чӏаго гьесул хабар лъазегӏан. Инсуда аскӏов вукъана нижеца гьев.
Краснодаралдаса ругьел бачӏиндал, дица абулеб букӏана гьенивго тейин гьев, ай ватарабго бакӏалдайилан. Амма гӏагарлъи разилъичӏо ва росулъе вукъизе восана», — ян бицана М. Маркъуловас.
Рагъде инегӏан росулъ цӏулал устарлъи гьабулеб букӏун буго Мусаца. Жакъаги нахъе руго доб мехалъ гьес гьарун рукӏана нуцӏби. Жеги хъизан гьабичӏев чи ун вуго гьев фронталдеги.
Гьаб кӏиабилеб хӏужа ккола Гъуниб районалдаса Кӏудияб Ватӏанияб рагъда тӏагӏарал солдатазул хутӏелал ватӏаналде тӏад руссинарураб. Анкьго соналъ цебеги, 2013 соналъул апрелалда, Салтӏа росулъ рукъана Къураев Сайпудинилги хутӏелал. Рагъ байбихьараб 1941 соналъул риидал армиялде арав гьевги рокъове вуссинчӏо. 1943 соналъ Сайпудинил эбелалъухъе кагъат бачӏуна дур вас араб бакӏ лъачӏого тӏагӏанин абун. 1956 соналдаса нахъе гьесул гӏагарлъиялъ, Оборонаялъул министерствоялъул цӏаралда кагътал ритӏулел рукӏана Сайпудинил къисмат цӏехон. 2012 соналъул октябралда гьезухъе кагъат бачӏана, Къураев Сайпудин Украинаялъул Одесса шагьаралда аскӏов хандакъалъув ватаниланги абун. Щивав солдатасухъ букӏунеб эбанитовая капсулаялда жаниб лъураб кагътида тӏад жиндирго росдалги, эбелалъулги ва жиндиргоги хӏакъалъулъ киналго баянал мухӏканго хъван рати сабаблъун ккун буго Сайпудинил жаназадул хутӏелал ратиялъе.