29 декабралда республикаялъул нухмалъулесул ишал тӏуралев Сергей Меликовас тасдикъ гьабуна цӏияб хӏукумат.
Хӏукуматалъул нухмалъулесул тӏоцересел заместителаллъун тӏамуна Нюсрет Гӏумаровги Батир Эмеевги.
Нюсрет Гӏумаров хӏалтӏулев вукӏана республикаялъул нухмалъулесул ва хӏукуматалъул администрациялда.
Батир Эмеев — республикаялъул промышленносталъул министрасул ишал тӏуралевлъун.
Анатолий Карибовги, Владимир Лемешкоги, Гӏабдулмуслим Гӏабдулмуслимовги, Муслим Телякавовги, Рамазан Жафаровги рукӏарабго хъулухъалда — хӏукуматалъул нухмалъулесул заместителаллъун тана.
Ракьулгун ва малмулкалъул гьоркьорлъабазул рахъалъ министрлъун тӏамуна Заур Эминов.
Тӏабигӏиял сурсатазул ва экологиялъул рахъалъ министрасул хъулухъалде тӏамуна Рахӏман Хӏамидов.
Гӏорхъолъа рорчӏарал ахӏвал- хӏалазул, тӏабигӏиял балагьазул ва гражданияб оборонаялъул министрлъун тана, цевеккунги гьелъул вукӏарав нухмалъулев Нариман Гъазимухӏамадов. Гьединго республикаялъул гӏолилазул министрлъун тасдикъ гьавуна Камил Сагӏидовги.
Дармилгун промышленносталъул министрлъун тӏамуна Низами Халидов. Экономикаялъулгун бакӏалъулаб цебетӏеялъул министрлъун — Руслан Гӏалиев.
Росдал магӏишаталъулгун нигӏматазул министрлъун тӏамуна чанго соналъ цевеги гьелъул нухмалъулевлъун вукӏарав Батал Баталов.
ЖКХялъулгун энергетикаялъул министрлъун вачӏана Манвел Мажонц.
Информатизациялъул, бухьеналъул ва массовиял коммуникациязул министерство кӏийиде бикьана. Гьелъул гьабуна Печаталъулгун информациялъул министерство ва нухмалъулевлъун тӏамуна, чанго соналъ цевеги гьебго хъулухъалда вукӏарав Гӏумаргӏусман Хӏажиев. Массовиял коммуникациязул бакӏалда гӏуцӏараб, Цифровоялъулаб министерствоялъул нухмалъулевлъун тӏамуна, гъоркьго вукӏарав министр Сергей Снегирев.
Гьединго жидерго хъулухъал цӏунана бакӏал раялъул министр Малик Баглиевасги, Культураялъул министерствоялъул нухмалъулей Зарема Бутаевалъги, транспорталъулгун нухазул магӏишаталъул министр Ширухан Хӏажимурадовасги, миллияб политикаялъул ва диниял ишазул рахъалъ министр Энрик Муслимовасги, лъай кьеялъул министр Уммупазил Гӏумаровалъги, туризмалъул ва халкъияб махщелчилъиялъул рахъалъ министр Расул Ибрагьимовасги.
Гъоркьго букӏараб хъулухъалда тана финансазул министр Юнус Сагӏадуевги, спорталъулгун физкультураялъул министр Мухӏамад Мухӏамадовги, жидерго хъулухъ цӏунана захӏматалъулгун социалияб цебетӏеялъул министрлъун йикӏарай Изумруд Мугутдиновалъги ва юстициялъул министр Казимухӏамад Сефиркъурбановасги.
Республикаялъул бетӏерасул ва хӏукуматалъул администрациялъул нухмалъулесул тӏоцевесев заместительлъун тӏамуна Мурад Казиев. Гьединго республикаялъул хӏукуматалъул капиталиял бакӏал раялъулаб управлениялъул нухмалъулевлъун тӏамуна Мухӏамад Гӏазизов.
Экономикаялъулгун бакӏалъулаб цебетӏеялъул министрлъун вукӏарав Хӏажи Султановасеги цӏияб хъулухъ кьуна. Новолак районалъул халкъ цӏияб бакӏалде гочинабиялъул ва Гӏавухъ район цӏигьабун гӏуцӏиялъул суалазул рахъалъ, республикаялъул хӏукуматалда рагьараб управлениялъул нухмалъулевлъун тӏамуна гьев.
Культураялъул нахърателал цӏунулеб ДРялъул агентствоялъул нухмалъулевлъун тӏамуна Махӏач Мусаев. Республикаялъул Гӏелмияб централъул археологиялъулгун тарихалъул ва этнографиялъул институталъул нухмалъулевлъун вукӏана гьев гьанжелъизегӏан.
Жанир чӏолел рукъзабазул рахъалъ Пачалихъалъулаб инспекциялъул нухмалъулевлъун тӏамуна Сергей Касьянов.
Республикаялъул ветеринарияб комитеталъул нухмалъулевлъун тӏамуна Мухӏамад Шапиев, пачалихъияб къайицӏа босиялъул рахъалъ комитеталъул нухмалъулевлъун — Жафар Хӏажибеков.
Рохьил магӏишаталъул рахъалъ комитеталъул нухмалъулевлъун тӏамуна Вагьаб Гӏабдулхӏамидов, тарифазул рахъалъ республикаялъул хъулухъалъул нухмалъулевлъун тана Камил Гӏалигъалбацӏов, Россиялъул президентасда цеве нилъер республикаялъул кидагосев вакиллъун тӏамуна Жамаладин Хӏасанов.
Финансазда хадуб хал кколеб ДРялъул пачалихъалъулаб хъулухъалъул нухмалъулевлъун тасдикъ гьавуна Махӏач Ибрагьимов. Гьеб ккола цебе Финансазул министерствоялъул къайимлъиялда гъоркьги букӏун, гьанже гьелдаса батӏа тӏезабун гӏуцӏараб цӏияб хъулухъ.