Бокьула дие гӏумруялъул гӏидраялда рокьул накъишал угьарал, къисматалъе анкькьераб нуралъул кьерал сайгъат гьабураб, риидал мугӏрузул авлахъазда рижарал тӏугьдузул релъабаз цо-цо бутӏаби релъарал цӏалдохъабазул хӏакъалъулъ хъвазе. Буго дир дирго гӏумруялъул хасаб тӏехьги. Гьелдаги буго цо чанго бутӏа, цӏалдохъабазул гӏисинал квераз жидерго къисматалде каву рагьарал. Гьале цӏидасанги дида цебе гьеб хӏикматаб тӏехь. Цӏидасанги тӏад юссуней йиго гӏагараб росдал школалде. Гьале тӏехьалъул иргадулаб тӏамач – ва гьенисан дие гьимулел руго Раисатилги Сидратилги сипатал. Дида цере кенчӏолел руго кӏудияб божилъигун дихъ ралагьун ругел гьезул хӏайранал берал. Школалде хӏалтӏизе ячӏун гӏемер заман иналдего, гьел рачӏана тӏоцебесеб классалде. Анцӏила цо соналъ гӏенеккана дун гьезул анищазул хӏанчӏазул сариназухъ. Цӏидасанги рагӏулел руго, «Щиб жо кколеб талихӏ?» абураб сочинение хъвалелъул, гьез дие кьун рукӏарал жавабал.
Раисат:
Дун талихӏайлъун йикӏине йиго, дир кумекалдалъун цониги чи талихӏавлъун лъугьани. Бокьун буго дирго лъимерлъиялъул анищ гӏумруялде бахъинабиялъе нигатги гьабун, тавакалаб гали тӏамизе тохтурлъиялъул хӏикматаб дунялалде ва хъахӏаб халгӏаталъе базе бугеб гьаялъе ритӏухъайлъун хутӏизе. Бокьун буго цогӏаги унтарасул гӏумру хвасар гьабизе, гьесие дунялалъул берцинлъи тӏад буссинабизе. Гьеле гьеб мехалда букӏина дие дирго талихӏалдаса рохелги лазатги…
Сидрат:
Дир анищ буго тохтурлъун яхъине. Гьелъулъ батила дир талихӏалъул магӏнаги. Бокьулеб хӏалтӏиги, хӏалтӏудаса свакан рокъое щваниги, цереса ине гьечӏел унтаралги, цинги цӏидасанги гьезухъе гӏедегӏун ине йигей дунгоги, дандего бачӏунеб унтаразул гьимиги, дида къвал базе гӏедегӏарал унтаралги. Гьеле гьединаб буго дир талихӏалъул аслияб сарин. Макьилъги цебеса унеб гьечӏо хъахӏаб халгӏат. Гьелда хъублъиялъул тӏанкӏ лъезе течӏого хӏалтӏун бажари – гьеле дир талихӏалъул кечӏ…
Къисматалъул нухазда
Долдаса нахъе ана гӏемерал сонал. Тӏурана ясазул анищал. Жакъа гьезул талихӏ гьалдолеб буго, гьеб боркьулеб буго унтаразде бугеб адабияб рокьуца.
Гьале жакъаги хӏайранго ялагьун йиго дун дирго цӏалдохъабазул суратазухъ. Гьезул гӏажаибго берцинаб балагьиялъ бицунеб буго жидерго талихӏалъул хӏакъалъулъ. Гьазда лъалеб букӏиндалха жидерго талихӏалъул багьаги, бакӏлъиги, тӏадагьлъиги, тамахлъиги, къуватги. Ва талихӏалъги хӏалбихьана гьезул – мустахӏикъал ругищ гьел жиндир кваркьидакь бугеб гьогьомиялъейилан.
Гӏумруялъул ахӏухъе
Ахӏи щвана Гъизилюрт шагьаралдеги. Рихха-хочи, магӏу, гӏоди. Гӏумруялъул зигара. Унтаразул угьди. Гьеле гьединаб букӏана дол къояз Раисатилги Сидратилги талихӏалъул сарин. Гьеле гьеб мехалда тӏубанго лъана гьезда жидецаго тӏасабищараб махщалил тӏадегӏанлъи. Къойилго дандчӏвалел хвелги гӏумруги. Къойилго сунеб гӏумру, судулеб бугеб къисмат. Къасилъи-къадлъи гьечӏого, гӏумру хвасар гьабизе «гьужумалъ» унел Раисатги Сидратги. Гӏумруялде бахъинабизе рес щвараб гьезул анищалъул хӏалбихьулеб букӏана макруяб унтуца.
Амма гӏумруялъ ахӏуд рахъинарурал гьезда ракӏалдецин кколеб букӏинчӏо къуркьизеги къезеги. Рукӏана хвелалги. Бугониги, Гъизилюрт шагьаралъул централияб больницаялъул хехаб кумекалъул машинаялъул тохтурзаби Сидрат Хӏажиевалъул ва Раисат Асадулаевалъул къуват гӏуна хвелгун къеркьезе. Ахир-къадги угьун биччазе рес щвана гьезул талихӏалъе.
Лъачӏо гьезда свак, сваказе заманги букӏинчӏо гьезие. Тезе ккана гьез макьуги. Хвасар гьабизе кӏвараб гӏумруялъул къвалакьанги баккун, гьимулеб букӏана гьезул талихӏги.
Сидратилги Раисатилги хӏалтӏуе тӏадегӏанаб къимат кьуна республикаялъул нухмалъиялъ. Доб заманалда ДРялъул бетӏерлъун вукӏарав Владимир Васильевасул цӏаралдасан гьезие Баркалаялъул кагътал кьуна больницаялъул бетӏерав тохтурас.
Цӏидасанги цоги нуралъ расенал угьана цӏалдохъабаз хъвазе тарал дир гӏумруялъул тӏохьол тӏанчазда.