Республикаялда кванил нигӏматазул багьабазда сверухъ лъугьун бугеб ахӏвал-хӏалалъул бицараб данделъи тӏобитӏана 9 марталда ДРялъул хӏукуматалъул вице-премьер Гӏабдулмуслим Гӏабдулмуслимовасул бетӏерлъиялда гъоркь. Гьенир гӏахьаллъана цо-цо районазул нухмалъулелги.
Гӏ. Гӏабдулмуслимовас абуна чара гьечӏого гӏадамазе хӏажалъулел цо-цо кванил нигӏматазул багьаби республикаяда гьабсагӏат чӏара-хьараб хӏалалда ругин. Амма тӏаде жубана ахираб кӏиго-лъабго анкьида жаниб гӏиял гьан циндаго хиралъанин. Гьедин 400-420 гъурщиде бахун буго гьеб.
Росдал магӏишаталъул министр Батӏал Батӏаловас абуна гьеб бараб букӏанин гӏияхъабаз хасел тӏамулел бакӏазда гӏунгутӏаби загьирлъиялдаги, гӏияе кӏалцӏи-хер хиралъиялдаги, гьан гӏезабулеб гӏуж жеги щун гьечӏолъиялдаги. Хасалидагун ихдада гьоркьоб гӏадамазе гьан чӏезабизе дагьаб захӏмат букӏунин.
Гӏиял гьан хиралъичӏого букӏине гьаризе хӏисабалде росарал цо-цо тадбиразулги бицана Б. Батӏаловас. Гьан гӏезабулел чагӏазе бигьаго букӏине хӏукуматалъул рахъалдаса субсидиял кьезе рукӏиналъулги бицана росдал магӏишаталъул министрас. Амма кигӏанасеб къадаралда гьеб кумек щвезе бугебали чӏванкъотӏарал тарихал рехсечӏо.
Росдал магӏишаталъул ярмаркаби тӏоритӏиялъги кӏудияб пайда кьолаанин кванил нигӏматазул багьаби хиралъичӏого рукӏиналъе, гьелги гӏемер тӏоритӏизе ккелин бицана данделъиялда.
Ахиралдаги Гӏ. Гӏабдулмуслимовас абуна багьаби хиралъизе кинго риччазе бегьуларин. Гьединго гьес муниципалитетазул бутӏрузда лъазабуна росдал магӏишаталъул хӏалтӏухъабазда бугеб хӏал бичӏчӏизабейиланги.
Ашахан ЮСУПОВ