ДАССР гӏуцӏаралдаса 100 сон тӏубаялда хурхун ва ДРялъул бетӏерасул ишал тӏуралев С. Меликовасул «2021 сон — ДАССРалъ 100 сон тӏубаялъул лъагӏеллъун лъазабиялъул» хӏакъалъулъ указалда рекъон, республикаялда ва гьеб бахун къватӏиб гьарулел руго батӏи-батӏиял тадбирал.
Нижеца цебеккунги хъван букӏана РФялъул Федералияб собраниялъул Федерациялъул советалда ва Пачалихъияб Думаялда тӏоритӏанин ДРялъул къоялилан.
Гьелъул аслияб масъала букӏана республикаялъул социалиябгун экономикияб ва культурияб цебетӏеялъул бугеб ахӏвал-хӏал улкаялъул нухмалъулезда бихьизаби ва ругел гӏунгутӏаби тӏагӏинариялъе кумек тӏалаб гьаби.
Нилъер республикаялъе кӏвар цӏикӏкӏараб данделъиялда бугеб ахӏвал-хӏалалъул бицун кӏалъана С. Меликов. Нухмалъулесул хӏалтӏуе лъикӏаб къимат кьуна Федерациялъул советалъул председатель В. Матвиенкоцаги.
Республикаялъул нухмалъулев дандчӏвана федералиял министрзабигунги. Хасго пайдаяблъун ккана С. Меликовасул ва ДРялъул хӏукуматалъул председателасул заместитель Гӏ. Гӏабдулмуслимовасул Россиялъул росдал магӏишаталъул министр Д. Патрушевасулгун букӏараб дандчӏвай. Гьез бицана республикаялъул агропромышленнияб комплексалъул, мелиорациялъул, цӏибил гӏезабиялъул, ччугӏихъанлъи цебетӏезабиялъул хӏакъалъулъ.
2020 соналда республикаялъ лъикӏал хӏасилал рихьизаруна могьолал культурабазул ва гӏаммаб тӏощалил къадар цӏикӏкӏинабиялда жанибги. Могьолал культурабазул бакӏарана 422,4 азарго тонна, пурчӏинадул — 111,6 азарго тонна, картошкадул — 357,1 азарго тонна.
Амма республикаялъе зарал гьабулеб буго Дагъистаналъул северияб рахъалда, Нугъаялъул авлахъазда ругел мучӏдул салуца рахчизарулел рукӏиналъ.
Исана гьеб бутӏа цебетӏеялъе Россиялъул «АПКялъул культураби экспорталде» абураб программаялдасан биччалеб буго 238,7 млн гъурущ.
Россиялъул федералиял министрзабазулгун гьарурал дандчӏваязул хӏасилалда къотӏи-къай ккана хадурккунги республикаялъул магӏишаталъул бутӏаби церетӏезариялъул рахъалъ чӏванкъотӏарал тадбирал гьаризе.
Зикрула ИЛЬЯСОВ