17 марталда ДРялъул хӏукуматалда тӏобитӏараб данделъиялда гьоркьоб лъун букӏана ччугӏил магӏишат цебетӏезабиялда хурхараб суал.
Ччугӏа гӏезабулел магӏишатазе субсидияздалъун санайилго пачалихъалъ кумек гьабулин бицана хӏукуматалъул председатель Гӏабдулпатахӏ Гӏамирхановас. Амма ччугӏа къачӏан, хӏадур гьабиялъул иш роцӏинабизе къваригӏун бугин тӏадеги жубана гьес. Республикаялда гьелъие шартӏал гьечӏолъиялъ ччугӏа къватӏибе баччулеб буго, гьелдалъун бакӏалъул бюджеталъе заралги кколеб буго гьенире налогал рачӏунел гьечӏолъиялъ.
ДРялъул тӏабигӏаталъул бечелъабазул министрасул ишал тӏуразарулев Рахӏман Хӏамидовас бицана 2019 соналда республикаялда ччугӏа гӏемер ккунила. Амма гьелдаса кӏиго нухалъ цӏикӏкӏанила гьеб гъоркьисала. Масала, 2020 соналда Дагъистаналда ккун буго ччугӏил 22 азарго тонна. Гьелда гьоркьоб гӏемерисеб килька букӏана.
Гьединго 2018 соналда байбихьана Махӏачхъалаялъул порталда ччугӏил терминал къачӏазеги.
Хӏамидовасда лъикӏаблъун бихьулеб буго зама-заманалдасан республикаялда ччугӏил ярмаркаби тӏоритӏизеги.
А. ЮСУПОВ