20 апрелалда «Дагъистан» РИАялда тӏобитӏараб пресс-конференциялда бицана Россиялъул гӏорхъи бахун къватӏир ругел ватӏанцоязул рахъалъ дагьалъ цебе бахъараб ДРялъул законалъул хӏакъалъулъ.
Гьелда гӏахьаллъана миллияб политикаялъул ва диниял ишазул министр Энрик Муслимов, Россиялъул МИДалъул Махӏачхъалаялда вугев вакил Гӏамирхан Мухӏамаддадаев, «Ватӏан» ассоциациялъул нухмалъулев Мухӏамад Мухӏамадов.
Гьеб закон къабул гьабуна исана 25 марталда. Гьелъ квербакъизе буго нилъер заманалда гуребги, советияб власталъул яги пачаясул заманалдаго Дагъистан тун къватӏире гочарал ракьцоязе кумекалъе гӏуцӏулел тадбиразе (рахьдал мацӏалгун маданият цӏунизе батаниги, нилъергун бизнес гьабизе къваригӏаниги).
Гӏамирхан Мухӏамаддадаевас бицана РФялъул даражаялда гьединаб закон 1999 соналдаго къабул гьабун букӏанилан.
Гьелдаса нахъе 22 сон индал бахъаниги, нилъее гьелъул хӏажалъи бугинги абуна гьес. Амма Мухӏамаддадаевасул щаклъи буго кколеб куцалда гьеб хӏалтӏизе букӏиналда. Масала, гьесул пикруялда рекъон, гӏасрабаз, чанго анцӏ-анцӏ соназ къватӏисел пачалихъазде гочарал нилъер гӏадамал умумузул ракьалде тӏад руссине гьечӏо.
-Дун МИДалъул вакиллъун вугеб щуго соналда жаниб цохӏо чӏужугӏадан кӏалъана нижехъе жиндие РФялъул гражданлъи гуреб, «вид на жительство» къваригӏун бугилан. Сириялда чӏарай дагъистанияй йикӏана гьей. Австриялда цӏалулел жиндирго лъималазухъе Россиялдасан ине бигьа букӏиналъ тӏалаб гьабулеб букӏун буго гьелъ «вид на жительство, -ян бицана Гӏамирхан Мухӏамаддадаевас.
Цинги Энрик Муслимовас мухӏкан гьабуна законалъул магӏна ватӏанцоял тӏубанго нилъехъего тӏадруссинари гурила, гьелдалъун рес бугила культуриял, экономикиял, медицинаялъул, туризмалъул ва цогидалги бухьенал щула гьаризе.
З. ХӏАЖИЕВА