Хӏажи Хӏамзатов гьавуна 1926 соналъул щуабилеб маялда Хунзахъ районалъул Цӏада росулъ, халкъияв шагӏир Цӏадаса Хӏамзатил хъизамалда. 1943 соналда лъугӏизабуна Гӏараниб росдал школа, 1948 соналда – Дагъистаналъул пачалихъияб педагогияб институт ва 1960 соналда – КПССалъул ЦКялда цебе бугеб Партиялъул тӏадегӏанаб школалъул журналистикаялъул отделение.
1949-1952 соназда хӏалтӏана СССРалъул РАНалъул Дагъистаналъул филиалалда бугеб Цӏадаса Хӏамзатил цӏаралда бугеб Тарихалъулгун мацӏалъул ва адабияталъул институталда, цин лаборантлъун, хадуб – гӏелмияв хӏалтӏухъанлъун ва гӏелмияв секретарьлъун, 1952- 1957 соназда вукӏана гьебго институталда кӏудияв гӏелмияв хӏалтӏухъанлъун, КПССалъул ЦКялда цебе бугеб Дунялалъул адабияталъул институталъул Дагъистаналда бугеб филиалалъул нухмалъулевлъун. 1962- 1963 соназда вукӏана ИЯЛИялъул гӏелмияв секретарьлъун. 1963-1970 соназда хӏалтӏана ДАССРалъул Министрзабазул советалда цебе бугеб Радиовещаниялъулгун телевидениялъул пачалихъияб комитеталъул председательлъун.
1970 соналда цӏунана «Цӏадаса Хӏамзатил гӏумру ва творчество: революциялда цебесеб заман» абураб темаялда гӏелмабазул кандидатлъиялде диссертация ва 1979 соналда – «Революциялда цебесеб Дагъистаналъул гӏемермиллатазулаб адабият лъугьин» абураб темаялда докторлъиялъе диссертация. 1970-1972 соназда хӏалтӏана ДАССРалъул культураялъул министрлъун ва 1972- 1992 соназда – ИЯЛИялъул директорлъунги 1992-2004 соназда – гьелъулго гӏелмияв нухмалъулевлъунги. 1980-1984 соназда вукӏана ДГПИялъул адабияталъул кафедраялъул профессорлъун.
1984 соналъул 26 декабралда Хӏажи Хӏамзатов вищана СССРалъул Гӏелмабазул академиялъул адабияталъулгун мацӏалъул отделениялъул академиклъун. 2000 соналъул 26 маялдаса нахъе вукӏана РАНалъул ДНЦялъул президиумалъул председательлъун ва 1998 соналдаса нахъе – РАНалъул гӏакълучилъун.
Хӏ. Хӏамзатовасул хӏаракаталдалъун ДНЦялъул гӏалимзабазул щулияб бухьен ккана Москваялда бугеб Инжилалъул таржама гьабиялъул институталъулгунги Макс Планкил цӏаралда бугеб Лейпцигалъул Эволюциялъулаб антропологиялъул институталъулгунги. Гьев вукӏана Европаялъул кавказоведазул жамгӏияталъулги, РАНалъул Востоковедазул жамгӏияталъул президиумалъулги, РАНалъул президиумалда цебе бугеб Маданиябгун тӏабигӏияб ирсалъул цӏех-рех гьабиялъулгун гьеб цӏуниялъул рахъалъ советалъулги, РАНалъул тарихалъулгун филологиялъул отделалъул «Ватӏаналъул ва дунялалъул адабиятгун фольклор» абураб Гӏелмияб советалъулги членлъун.
Гьелде тӏадеги гьев вукӏана РФялъул Хъвадарухъабазулги, Журналистазулги ва Театралиял хӏаракатчагӏазулги союзазул членлъунги.
Цӏадаса Хӏамзатил цӏаралда бугеб Гуманитариябгун маданияб ва лъай кьеялъул жамгӏияб фондалъул председатель, ДРялъул президентасда цебе гӏуцӏараб Пачалихъияб премиялъул Гӏелмуялъулги, техникаялъулги, адабияталъулги, искусствоялъулги ва архитектураялъулги рахъалъ комиссиялъул член, Херазул советалъулги ДРялъул президентасда цебе бугеб Гӏурус мацӏалъул советалъулги член, Хӏажи Хӏамзатов вукӏана РАНалъул ДНЦялъул ИЯЛИялъул «РФялъул халкъазул адабият», «Фольклористика» ва «РФялъул халкъазул мацӏал: Кавказалъул мацӏал» абурал диссертациялъул советазул нухмалъулевлъунги РАНалъул А. Горькиясул цӏаралда бугеб
Дунялалъул адабияталъул институталъул «РФялъул халкъазул адабият» абураб махщелалъул рахъалъ диссертациялъул советалъул членлъунги.
Россиялъул Тӏабигӏиял гӏелмабазул академиялъулги Москваялъул авиациялъул институталъулги, Санкт-Петербургалъул Гӏелмабазулгун искусствоялъул Петровская академиялъулги хӏакъикъияв академик, Адигеялъул (Черкесиялъул) Халкъазда гьоркьосеб академиялъулги Гуржиялъул Миллияб академиялъулги къадруяв член Хӏажи Хӏамзатов Аллагьасул къадаралде щвана 2011 соналъул анлъабилеб октябралда. Гьесул букӏана 85 сон.