Ахираб микьго соналъ ДРялъул Халкъияб Собраниялъе спикерлъиги гьабун, Хизри Шихсагӏидов хӏалтӏудаса нахъе ана 9 июналда. Иргадулаб гуреб сессиялда депутатаз гьединаб хӏукму гьабуна.
Заманаялъ спикерасул хъулухъ тӏадкъарав Халкъияб Собраниялъул вице-спикер Сайгидахӏмад Ахӏмадовас сессиялъул байбихьуда абуна Шихсагӏидов хӏалбихьи бугев политикги кколин, гьесул хӏакъалъулъ лъикӏаб гурони бицинеги бицунарин абун.
Амма живго гьев сессиялда гӏахьаллъичӏо. Сайгидахӏмад Ахӏмадовас бицухъе, Хизри Шихсагӏидов радал кӏалъан вуго гьесухъе жиндир рахъалдаса депутатазе баркала кьейинги абун.
Шихсагӏидов Халкъияб Собраниялъул нухмалъиялдаса унев вукӏин лъана 7 июналда. Парламенталъул аппараталъул данделъиги гьабун, гьес абун буго жив хӏалхьиялде унев вугилан.
Хизри Шихсагӏидовги нахъе ун, гьеб отделениялъул секретарьлъи гьабизе тӏадкъана ДРялъул нухмалъулев Сергей Меликовасда.
Нахъисеб къоялъ лъана Х. Шихсагӏидовас парламенталъулгун къо-лъикӏ гьабулеб букӏинги. Гьес социалиял гьиназда хъвалеб букӏана жинца депутатазда гьаранила жив мустахӏикъаб хӏалхьиялде виччайин абун.
Цинги хадубго Инстаграмалда суратги лъуна Шихсагӏидовас – батӏи-батӏияб ригьалъул гӏадамазул кӏудияб къокъа бугоан гьесда сверухъ чӏун. Гьелда гъоркь хъван руго гьадинал мухъалги: «Пенсиялде ине хӏукму гьабун бахъиналдего дихъе батӏи-батӏиял бакӏаздаса гӏадамал рачӏине лъугьана дир рахъкколеб букӏинги бихьизабун. Кутакалда лъикӏаб республика буго нилъер. Гьеб цӏунизе ккола нилъеца. Дагъистаналъул нухмалъиялъеги бергьенлъаби гьаризе бокьун буго. Хьул буго халкъалдаги гьеб бичӏчӏилин», — абун.
Интернеталда гӏезегӏан чагӏаз лъун руго Хизри Шихсагӏидовасда хурхун жиде-жидер пикрабиги, ай лъикӏалги квешалги.
Масала, «Дагъистан» журналалъул бетӏерав редактор Мухӏамад Бисавгӏалиевас хъвалеб буго Пачалихъияб Советалъул председатель Мухӏамадгӏали Мухӏамадов политикаялдаса нахъе анила 76 сон байдал, Хизри Шихсагӏидов анила 74 сонил ригьалде вахиндал.
«Шихсагӏидовасулгун лъай-хъвай буго дир, амма гьудуллъи гьечӏо. Дие гьесулъ бокьулаан гӏадамалгун гъорлъ восун вукӏин, гӏадатлъи, киназдехунго адаб букӏин. Сессия байбихьизе кӏиго минут хутӏидал, Шихсагӏидов залалдаса гӏебеде хьвадун, сессиялде ахӏарал нижгун гара-чӏварун, киназего салам кьолев вукӏунаан.
Гьев вуго политикаялда рукӏунел хӏаялги ричӏчӏулев, кӏудияб хӏалбихьиги бугев политик. Гьединлъидал гьесда кӏолаан батӏи-батӏиял политикиял къуватазда гьоркьоб рагӏи бицине, гьезулгун хабар рекъезабизе.
Интернеталда хъвадарулел дагъистанияз, щаялиго, гьесул бищун кӏудияб гьунарлъун рикӏкӏунеб буго 49 соналъ тӏалъиялда хутӏи.
Хизри Шихсагӏидовасул бакӏалда заманаялъ Сайгидахӏмад Ахӏмадов таниги, жеги лъаларо хадув гьенив щив тасдикъ гьавилевали. Гьеб лъазе буго сентябралда рукӏине ругел рищиял тӏоритӏун хадуб.