17 июналда Патӏимат Хӏамзатовалъул цӏаралда бугеб республикаялъул музеялда рагьана Россиялъул халкъияв художник, машгьурав цӏулал устар Хӏамзат Гъазимухӏамадовасул хӏалтӏабазул цебелъей.
Хӏамзат ккола Унсоколо росулъа цӏар рагӏарал художниказулги цӏулал устарзабазулги наслу-тухумалъул чи. Гьев вуго гӏицӏго ансадерие хасиятал накъищал рикӏиялъул махщелчи. Гӏолохъанго тӏатана гьесулъ махщел, сон барабгӏан камиллъана жиндиего хасиятаб устарлъиялъул хатӏги, художникасул мацӏги. Хӏамзатица, жиндирго хӏалтӏабазулъ цӏиги гьарун, халкъалъе рагьана некӏсиял ансадерил накъищал.
Цебесеб къагӏидаги цӏунун, гьес ургъана жиндирго накъищалги. Ан- садерил накъищал тӏад рикӏарал хӏалтӏаби руго дунялалда кирниги такрарлъи гьечӏел, лъиданиги релълъинчӏел. Хӏамзатица кӏудияб квербакъи гьабуна жидерго мухъалъул накъищазул къагӏидаби цере тӏезариялъе.
Хӏамзат Гъазимухӏамадов вуго азаргоялдасаги цӏикӏкӏун хӏалтӏия лъул автор. Гьесул кверзул устарлъиялъул тӏагӏелал руго нилъер улкаял- да гурелги, къватӏисел пачалихъазул музеяздаги.
Гьеб цебелъеялъухъ ралагьизе къокъаби ккунниги, жалго цохӏониги гӏемер гӏадамал ругоан рачӏунел. Гьенире рачӏун руго Дагъистаналде хӏухьбахъизе щварал туристалгицин. Гьезиеги Хӏамзатил устарлъиялъ кӏудияб асар гьабунин бицана нижее музеялъул хӏалтӏухъабаз.
Хӏакъикъаталда, дунгоги хӏикматал гьавуна гьел хӏалтӏабаз. Гьезулъ бихьулеб бугоан авторасул кверазул квалиялдасаги ракӏалъ гьабураб хӏалтӏи цӏикӏкӏун букӏин. Магӏарулазул батӏи-батӏиял цӏулал тӏагӏелазда рухӏ бижизабун бугоан гьезда тӏад рикӏарал батӏи-батӏиял накъищаз. Гьеб киналъго паналъи- завурав дида ракӏалде рачӏана гьал рагӏаби:
Квартӏил кӏутӏи рагӏула, рекӏел кӏутӏи кинигин,
Рогьел мугӏрузул тӏогьиб тӏибитӏулеб гӏужалда…
Хӏамзат Гъазимухӏамадовас 70 сон тӏубаялда хурхун гӏуцӏараб гьесул хӏалтӏабазул цебелъей букӏине буго 18 июлалде щвезегӏан.
Мухӏамад МАНАПОВ