ДРялъул хӏукуматалъул председателасул тӏоцевесев заместитель Мурад Казиевасул гӏахьаллъигун тӏобитӏараб Жамгӏияб палатая лъул данделъиялда бицана республикаялда вакцинация гьабиялъул хӏакъалъулъ. Гьеб тадбиралда гӏахьаллъана жамгӏиял гӏуцӏабазул нух малъулелги.
Жамгӏияб палатаялда
Кӏалъазе рахъарал Жамгӏияб па латаялъул председатель Гӏабдулмуъмин Ибрагьимовас, Роспотребнадзоралъул нухмалъулев Николай Поповас, республикаялъул сахлъи цӏуниялъул министр Татьяна Бе- ляевалъ, тележурналист Ильман Гӏалипулатовас, «Хӏакъикъат» газеталъул бетӏерав редакторасул заместитель Зикрула Ильясовас, Ша- милил фондалъул бетӏер Гӏалиасхӏаб Хархачаевас бицана церечӏарал масъалабазул ва сунде кӏвар кьезе кколебали. Ахираб заманалда кови- далъ унтаразул къадар гӏемерлъулеб букӏиналъе гӏиллалъунги рехсана цӏодорлъи гьабунгутӏиги тохтурзабазул рагӏи гӏадахъ босунгутӏиги.
Т. Беляевалъ абуна Дагъистан вакцина гьабиялъул рахъалъ Россиялъул регионазда гьоркьоб рачӏчӏалда бугин. Унти тӏибитӏиялъе гӏиллаги кколин жиндир заманалда вакцинация гьабиялде кӏвар кьунгутӏи.
Республикаялда вакцина гьабизе ккола халкъалъул 60 проценталъе, ай миллионгун 300 азарго чиясе. Гьеб масъала тӏубазабизе ккани, щибаб къойил вакцина гьабизе ккола къоазаргогӏанасев чиясе. «Масала, 17 июналда республикаялда унтун вукӏун ватани 176 чи, нахъисеб къоялде гьезул къадар бахана 210-ялде. Гьабсагӏаталда 502 чи вуго кислородалъул кумекалдалъун хӏухьел цӏалев», — ан бицана министралъ.
Республикаялъул больницабазда ковидалъ унтаразе хӏадурун буго кӏиазаргоялдасаги цӏикӏкӏун койка.
Цӏуна-къаялъул тадбирал рагӏа-ракьанде щун тӏуралеб къогоялдасаги цӏикӏкӏун районалда сордо-къоялда жанив цониги чи унтичӏолъиялъул хӏужжабиги руго.
Данделъиялъул хӏасиллъун ккана республикаялъул халкъалде вакцина гьабизе ккеялъул хӏакъалъулъ хитӏаб гьаби. Гьелдаго цадахъ жамгӏиял гӏуцӏабазда тӏадкъана гьеб иш хехго тӏубаялъе гьарулел тадбирал гӏумруялде рахъинаризе. Шамилил фондалда «Шамилил фонд» абураб культуриябгун тарихияб жамгӏияб гӏуцӏиялдаги тӏобитӏана коронавирусалде данде вакцинация гьабизе ккеялъул хӏакъалъулъ бицараб данделъи. Фондалъул президент Гӏалиасхӏаб Хархачаевас бихьизабуна гьеб рахъалъ республикаялда ахӏвал-хӏал хӏалуцун букӏин.
— Коронавирусалъ унтаразул къадар къойидаса-къойиде цӏикӏкӏунеб буго. Вакцина гьабизе бегьуларин, вирусги ургъун бахъараб жо бугин ахӏи балел гӏадамазулгун «рагъ базе» ккун буго. Гьединал гӏадамазухъ гӏенеккун чӏани, дагь-дагьккун тӏагӏине буго нилъер халкъ, — ан абуна Хархачаевас.
Данделъиялда гӏахьаллъи гьабурав ДРялъул Жамгӏияб палатаялъул председатель Гӏабдулмуъмин Ибрагьимовас абуна цебеялде данде жеги захӏматаблъун лъугьун бугин унти.
— Коронавирусалдаса цӏуниялъе, вакцина гуреб, тӏокӏаб батӏияб къагӏида гьечӏо. Нилъеца гьитӏинаб къоялдаса нахъе гриппалде ва цогидалги рахунел унтабазде данде прививкаби гьарулаан. Жакъа гӏадинаб дандечӏейги харбалги тӏиритӏизарулароан, абураб вакцинаги гьабун чӏолаан. Гьез инсанасе кинабгӏаги зарал гьабилинги ракӏалдего кколароан. Гьанже жидедаго ракӏалде ккараб жо бицунеб буго гӏадамаз. Гьелдалъун жидеегоги гӏагарлъиялъеги хӏинкъиги лъугьинабулеб буго. Масала, цо-цояз абулеб буго вакцина гьабуралги унтулел ругин.
Вакцина гьабурал гуро унтулел ругел, унтулел руго гьеб гьабунин абун гьересиял справкаби росарал. Дицагоги гьабуна коронавирусалде данде прививка. Гьеб гьабизе нуж киналгоги ахӏула, — ян бицана Жамгӏияб палатаялъул председателас.
ДРялъул бетӏерасул гӏакълучи Шамхалдибир Гӏисаевас бицана, ДРялъул бетӏерасул тӏадкъаялда рекъон, лъабго къоялда жаниб анкьго районалде щванин коронавирус тӏибитӏиялъул ва вакцинация гьабиялъул ахӏвал-хӏал цӏехезе.
— Гьел районазда халкъалъул 30-40 проценталъ гурони, прививкаби гьарун гьечӏо, унтаралги цӏикӏкӏунел руго. Гьел къоязда гьабураб бичӏчӏикьеялъул хӏалтӏудаса хадуб вакцина гьабулезул къадарги цӏикӏкӏана, унтаралги дагьлъана. Вакцинациялдаса хадуб захӏмалъи ккараб яги чи хвараб цогӏаги хӏужжаги ккечӏо, — ян бицана ДРялъул бетӏерасул гӏакълучияс.
Аваразул культурияб автономиялъул председатель Айтемир Сатираевас ракӏалде щвезабуна байбихьуда РФялъул президент Путиница коронавирусалъул бицун, гьелдаса цӏунеян лъазабидал, гӏемерисел божулел рукӏинчӏолъи. Хадуб гӏадамал хвезе байбихьидал, щибаб рокъоса чи унтидал, дару балагьулелги хутӏанин абуна гьес.
Патӏимат СУЛТӏАНМУХӏАМАДОВА