1 сентябралдаса байбихьун нилъер республикаялъул школазда хӏалтӏулел мугӏалимзабазул харж цӏикӏкӏинабизе буго 23 проценталъ. Гьеб ккола гӏага-шагарго 3000-гӏанасеб гъурущ. ДРялъул Хӏукуматалъ гьабун буго гьединаб хӏукму.
Мисалалъе, категория гьечӏев мугӏалимасул харж цӏикӏкӏине буго 12700-ялдаса 15700 гъурщиде щвезегӏан ва гьелда рекъон цӏикӏкӏине руго цогидазулги.
Сагӏтал ва гьединго категория гӏемер бугев чиясе дагьабги цӏикӏкӏун щвезе буго моцӏалъе гӏарац.
Амма гьеб гӏарац щвезе буго ДРялъул Лъай кьеялъул министерствоялде гъорлъе унел школазе. Бакӏалъул муниципалитетазда гъорлъе унел школазе, гьанже цӏикӏкӏинабураб моцӏрол харж щвезе ккани, гьел муниципалитетазул нухмалъулезул хӏукму къваригӏунеб буго.
Гьелда хурхун, районазул нухмалъулезул пикраби лъазе бухьен гьабуна нижеца, амма жеги гьелъул чӏванкъотӏи гьечӏин абуна нижергун гара-чӏвари гьабураз. Гьелдалъун нижецаги лъугӏизе толеб буго.
Аллагьас хъван батани, ниж гьеб темаялде газеталъул хадусел номеразда жеги тӏад руссина.
А. ЮСУПОВ