Коронавирусалда сверухъ республикаялда ахӏвал-хӏал жеги лъикӏлъун гьечӏо. Цӏакъ гӏемерав чи унтулев вугин баян кьолеб буго официалиял хъулухъаз. Сордо-къоялда жанив унтаразул къадар 150 чиясдаса цӏикӏкӏун буго. Мисалалъе, 30-31 августалда больницаялде ккун вуго 180 чи. Цо сордо-къоялда жаниб хун вуго 22 чи. Сахлъун къватӏиве виччан вуго 167 чи.
Август моцӏалда жаниб республикаялда коронаялъ хун вуго 475 чи. Гьеб ккола роол моцӏазда жаниб бищун кӏудияб къадар.
Республикаялда коронаялъ кинавниги унтун вуго 47756 чи, сахлъун вуго 43099 чи, хвана 2022 чи. Цӏакъ пашманаб хӏал буго гьабсагӏат гьелъул рахъалъ республикаялда. Больницабазде гӏага-божарал ккарал чагӏаз бицунеб буго гьезие хӏажатал дараби ратулел гьечӏин абунги. Мисалалъе, Махӏачхъалаялъул тӏоцебесеб клиникаялъул больницаялда егун йигей гӏагарай гӏаданалъе дару гьениб батичӏого, жидецаго босизе кканин 38 азарго гъурщидеян бицана гьал къоязда пуланай гӏаданалъ.
2020 соналъул ихдал букӏараб ахӏвал-хӏал, гьанже бугелда дандеккун «бертин» букӏанин абулеб буго жалго тохтурзабазги. Гьаб нухалда унтаразда гъорлъ гӏемер руго гӏолохъанаб ригьалъул гӏадамал.
Цебеги лъазабун букӏахъе, бертаби, магӏирукъзал ва цогидалги дандеруссинал гьаризе гьукъун букӏанинги, гьелъул милат гьабулеб къанагӏат гурони гьечӏо. Гӏемерав чи данделъараб бакӏалда нусгоялда гьоркьов цо чи ватизе бегьула гьурмада маска ххурав. Гьедин буго гьабсагӏаталда республикаялда иш. Цӏодорлъи гьабеян абулеб буго тохтурзабаз. Амма бищунго лъикӏаб бугин киназго вакцина гьабуни. «Вакцина, вакцина, нахъеги вакцина», — ян буго щибаб къоялъ ахӏи балебги. Гьелъулъ гурони хвасарлъи гьечӏин бицунеб буго сахлъи цӏуниялъул хӏалтӏухъабазги.