Анлъабилеб сентябралдаса байбихьун республикаялда унел руго «Хъахӏал къункърабазул къоял» абураб Р. Хӏамзатовасул цӏаралда халкъазда гьоркьосеб литературияб фестиваль.
Исана гьеб тадбир тӏобитӏулеб буго 35-абилеб нухалъ. Кӏудияв шагӏир гьавуралдаса исана тӏубала 98 сон. Фестивалалъул тӏоцебесеб къоялъ гьалбал щвана ДРялъул Хъвадарухъабазул союзалде, 51 соналъ Расулица нуцӏа рагьараб ва къараб, гьесул кабинеталъуб бугеб музеялде.
Нахъисеб къоялъ, 7 сентябралда, «Дагъистан» РГВК каналалда тӏобитӏараб «гургинаб столалдаги» гӏахьаллъана гьалбал.
Щвана гьел «Россия — дир тарих» музеялде, дандчӏвана ДГУялъул студенталгун ва мугӏалимзабигун.
Шагӏир гьавураб къоялъ, 8 сентябралда, киналго рахана Таргъу магӏарда бугеб Расулил хабаде, сагӏат ичӏгоялда Гӏурус театралда цебе бугеб гьесул памятникалда цере тӏугьдулги лъун, киналго къокъана Ленинил комсомолалъул цӏаралда бугеб ахикье.
Республикаялъул хӏукуматалъул рахъалдасан кӏалъай гьабуна вицепремьер Муслим Телякавовас. 2023 соналда Расул Хӏамзатов гьавуралдаса 100 сон тӏубай кӏодо гьабизе буго тӏубараб улкаялдаго. Гьелъул хӏакъалъулъ бицана Муслим Телякавовас дагьаб гӏатӏидго. Президент Владимир Путиница хас гьабун гьелда хурхун бахъараб указалда гъоркь гъулги басун буго. Гьеб указалда рекъон, 2023 сон лъазабун буго Хӏамзатовасул лъагӏеллъун. Улкаялъул киналго регионазда тӏоритӏизе руго Расулил хӏурматалда дандеруссинал. Ниж тӏадчӏун хӏадурлъулел ругин гьеб тадбиралдеян бицана М. Телякавовас.
Хадув кӏалъазе вахъана Россиялъул Хъвадарухъабазул союзалъул нухмалъулев Николай Иванов. Нилъер республикаялъул Хъвадарухъабазул союзалъул правлениялъул нухмалъулев Мухӏамад Ахӏмадовасулги букӏана лъикӏаб кӏалъай. Хъахӏал къункърабазул сипат цебе чӏезабулеб ретӏа-къайгун школлъималаз бихьизабуна берцинаб кьурди.
Расулил къоялде Махӏачхъалаялде рачӏун рукӏана Башкириялдаса, Сириялдаса, Сагӏудиязул Гӏарабиялдаса гьалбал. Данделъи биххун хадуб «литературияб Махӏачхъалаялда» свери бахъизеги ана гьел киналго.
Гьединго микьабилеб сентябралда Россиялъул Хъвадарухъабазул союзалъул нухмалъулев Николай Ивановгун дандчӏвана республикаялъул бетӏер Сергей Меликовги.
Дандчӏваялда гӏахьаллъи гьабуна Мухӏамад Ахӏмадовасги, ДРялъул культураялъул министр Зарема Бутаевалъги.
Расул Хӏамзатовасул гьунаралъул тӏадегӏанлъиялъеги, мегӏергӏан борхатаб гьесул поэзиялъеги кӏудияб къиматги кьун, Сергей Меликовасги бицана 2023 соналда кӏодо гьабизе бугин шагӏирас 100 сон баялъул юбилей.
Гьес абуна хӏисабалде росичӏого тарал цо-цо жалги хутӏун ругин гьеб тадбиралда хурхун ва гьездеги кӏвар кьезе бугин. Мисалалъе, Москваялда Расул Хӏамзатовасул юбилеялъул хӏурматалда «Дагъистаналъул анкь» абураб тадбир тӏобитӏани лъикӏаб букӏинаанин. Гьединго кӏудияв шагӏирасул юбилеялда хурхун тадбирал гьаризе бегьулин къватӏисел пачалихъаздаги.
Гӏурус театралда, Расулил памятникалда цебе лъай-хъвай ккана дир Калугаялдаса гӏолохъанай шагӏир Фериде Ибрагьимовалъулгун. Гьелъул умумул ккола Сулейман-Стӏал районалдаса. 40 соналъ цере гочун руго гьел гӏурус ракьалде. Фериде гьаюна ва гӏуна Калуга шагьаралда. Анлъго сон баралдаса нахъе хъвалел руго гьелъ кучӏдул. Цӏакъ бокьулеб буго гьелъие поэзияги Расул Хӏамзатовасул творчествоги. Кӏудияв шагӏирасул хӏурматалда тӏобитӏулеб тадбиралде щвезелъун ячӏанин жий ватӏаналдеян бицана Феридеца.
Калугаялда гьелъ гӏуцӏун буго литература бокьулел гӏолилазул къокъа. Гьединго интернеталда «Ютуб-каналалдаги» рагьун буго гьединабго канал. Расулил кучӏдул жинца гьенисан цӏалулин абуна гьелъ.
Гьей ккола Москва шагьаралъул Хъвадарухъаби-таржамачагӏазул союзалъулги, Профессионалиял литераторазул союзалъулги вакил. Миллияб ретӏелги ретӏун ячӏун йикӏана гьей Расулил памятникалда цере тӏугьдул лъезе.
Кӏудияв шагӏирасул хӏурматалда тӏоритӏулел тадбирал халат рахъине руго 10 сентябралде щвезегӏан. Хъвадарухъабазул кӏудияб къокъа щвезе буго Дербенталде, Гъунибе ва гьединго шагӏирасул ватӏан Хунзахъегун Цӏада росулъе.
Гьелъул хӏакъалъулъ нижеца гӏатӏидго хъвазе буго газеталъул хадусеб номералда.
Ашахан ЮСУПОВ