Нилъер республикаялда буго чанахъабазулгун ччугӏихъабазул жамгӏияб цолъи. Гьеб цолъиялде гьоркьоре унезда ракӏалда буго Махӏачхъалаялъул аслияб майданалде рахъине. Гьелъие бугеб гӏиллаги ккола чан гьабизе ва ччугӏа кквезе гьезул къайимлъиялда рукӏарал ракьал республикаялъул Тӏабигӏиял сурсатазул ва экологиялъул министерствоялъухъе кьей.
Гӏаммаб куцалда гьединал ракьазул 716 гектар буго республикаялда. Гьениб буго чанахъаби хьвадулеб 29 батӏияб ракь, къокъго абуни, чан гьабизе ва ччугӏа кквезе гьел хьвадулеб бакӏ. 1945 соналдаса нахъе гьезул ихтияралда рукӏун руго гьел ракьалги. Исана 1 сентябралда лъугӏун буго ижараялъе гьел хӏалтӏизаризе чӏезабун букӏараб болжал.
Жидее бокьун букӏанин гьеб болжал халатбахъинабизе, лъабго моцӏалъ цебе документалги хӏадурун рукӏанин бицана чанахъабазгун ччугӏихъабаз. Амма инкар гьабун буго. Гьелда ракӏ рекъечӏого судалдеги ун руго гьел. Гьанже гьез къотӏараб хӏукмуялда бараб букӏинаха кинабго.
Рехсараб министерствоялда ракӏалда батулин гьел ракьал хасал чагӏазул бетӏергьанлъиялде кьезеян рикӏкӏунеб буго чанахъабазул жамгӏияталъул цевехъан Александр Гаркушаца. Амма жал разилъун гьабулеб хӏукму гьеб букӏинарин абун ццим бахъунги вуго чанахъан.
Гьезул данделъиялде вачӏун вукӏана низам цӏунулел хӏалтӏухъабазул вакилги. Жив нужер пикруялда рази вугин, амма дандечӏеялда хурхун нужеца гьаризе ругел тадбирал законалда рекъезаризе кколин абуна гьес.
Республикаялъул чанахъабазулгун ччугӏихъабазул жамгӏияталъул нухмалъулев Завурбек Вагидовас бицана, цадахъ рекъон хӏалтӏани, мурадалде щвезе рес бугин. Республикаялъул нухмалъулев Сергей Меликовасухъе кагъат хъвани лъикӏаб букӏининги абулеб буго гьес.
Ашахан ЮСУПОВ